每到年尾，打工仔最希望知道明年有冇得加薪，但近幾年經濟差，就算好彩唔俾老細減薪，相信都要凍薪。噚日恒基系開股東會，四叔李兆基話，預計明年經濟會好番，八方當然打蛇隨棍上，問佢會唔會加人工畀下屬啦。四叔就笑笑口話：「今年唔加，出年都有機會加㗎喇。」咁即係幾時啫？「若果股市升到兩萬點，就加都冇乜所謂啦。」噚日股市收萬二點，各位恒基員工，慢慢等喇。
講開恒基股東會，踩盡各大藍籌場嘅股壇長毛DavidWebb，噚日可能因為要去開一個講公司管治嘅研討會，所以冇去搞恒基，恒基為咗招呼DavidWebb、今年特別請嚟即時傳譯，早知就慳番。重有，以往恒基系三間公司嘅股東會都係每間半粒鐘，唔知係咪預咗DavidWebb踩場有排磨，所以安排隔成粒鐘先開另一個會，但DavidWebb唔到，好得閒，開完第一、二個會，唔知四叔係咪覺得悶悶哋，八方見到佢走去同啲小股東傾偈，想唔到DavidWebb今次冇踩場，反而俾機會股東同四叔接觸。
（圖）四叔李兆基（右）預計明年經濟轉好，所以四萬咁口。
傳真︰2623-9278
電郵︰