呢排歐洲主要聯賽出現有利客軍現象，尤其係禮拜日啲波，除咗英超米堡、意甲烏甸、德甲史浩克同法甲聖日耳門作客W外，西甲就竟然有三支客軍贏波；不過，西甲情況有啲唔同，因為賽程密同埋多場比賽踢水戰，令戰果有啲反常。
禮拜日西甲維拉利爾、切爾達同桑坦德全作客勝出，之不過我求大俠相信，唔係呢啲球隊實力過人，只不過係西甲周中開快車，加上場地起變化；又或者周中及下周對手較惡啃，於是呢周聯賽就有所避忌。
大家最緊要留意巴塞同皇馬，因為佢哋周六要硬碰，所以我求大俠驚佢哋禮拜三分別鬥馬拉加同馬體會時就住踢，波友自行推敲啦！
AC米蘭喺周一正式同巴西球星李華度解約，距離轉會市場重開得嗰一個月，AC始終唔肯畀佢𢭃多個月糧。點都好，佢離隊唔令人意外，家陣所有人都關心佢會以自由身轉去邊。
之前就傳過佢猛向英超嘅車路士送秋波，又係嘅，今時今日無幾多隊出得起高薪請球員㗎。
奧雲近期足球事業發展都算停滯不前，最近又再次受傷患困擾，被迫做十字兵。不過，佢早前就同日本一間服裝公司合作，成為西裝系列代言人，實行步碧咸後塵搵日圓，個廣告亦喺噚日正式喺日本登場。
我求大俠真係羨慕呢類球星，唔使踢波都可以令荷包腫脹！
今季湖人有咗「四條A」之後，好似攞梗總冠軍咁，搞到帝王理都冇人理吓；帝王見咁樣，可能有啲唔甘心，噚日就攞咗網隊嚟「出氣」，半場已經贏到六十比二十八，直頭係大人同細路仔打波咁。打完場波之後，網隊主將傑特都話幾乎要掟白毛巾投降，睇怕湖人今年想入決賽，都要問過帝王先。