每逢節日，都係商場大業主搞新思意爭取消費者光顧嘅日子，今個聖誕節已經陸續有商場大業主披露自己嘅撒手鐧，今日就輪到恒基同新地出招嘞。
恒基嘅將軍澳新都城中心二期商場，耗資二百萬裝身迎聖誕，商場最殺食嘅係有一個全港最大嘅噴雪音樂盒，闊三十呎，以歐陸聖誕做背景，喺指定時間就會一邊漫天飄雪，一邊播放悅耳音樂鈴聲，又有聖誕老人駕駛一列歐洲火車出嚟。
另外，新地今日就喺沙田新城市廣場宣布「新地商場奇幻聖誕」記者會，講吓旗下商場嘅聖誕宣傳同推廣活動，禮拜三就喺中環國際金融中心商場舉辦「雪國傳說」百老匯式表演記者會。禮拜四重去廣州開記會，內容係「新地商場聖誕春節購物放心遊」，招攬內地客嚟港幫襯新地商場。睇嚟各商場嘅競爭愈嚟愈激烈。
香港人買樓好得意，有啲幾乎睇都唔睇閃電落槌，但有啲就千挑萬選至肯入市。好似北角雲景台中層B單位嘅買家，就經過八年睇樓，先揀到心水單位，用五百零八萬買入呢個連車位嘅一千一百九十八方呎單位，前後睇過二百個單位，睇嚟代理要賺佢嘅佣都唔容易。
聽做成交易嘅中原高級區經梁惠卿講，呢名買家本身有樓住，所以要求就會多啲，最初揀嘅範圍就廣泛啲，一二手都睇，後期就指定要雲景道嘅住宅，重一定要面積千二呎，單邊同開揚，咁只有雲景台B、C同D室至啱佢要求。
由於聖誕同新舊曆年係十二月同一月兩個月，房屋委員會有見及此，上個月就匆匆攞咗北角邨東座塊地出嚟招租，畀人搞吓為期約三個月嘅短期展覽，既可善用資源，又可幫補吓財政。可能因時間急咗啲，只係收到兩份建議書。
房委話，因佢哋建議嘅租金水平、所搞展覽嘅可行性，同埋對社區嘅滋擾程度嚟睇，兩份標書都未能符合要求，所以最終都冇租到幅地出去。
𠵱家房委惟有等攞到地政處批出嘅短期豁免使用書，喺明年初一次過推出招租，租期就達兩年，但用途仍以工業展覽為主。
雖然話樓市氣氛好番少少，但地產代理仍靠一手盤維生，好多時都會夥拍發展商搞優惠開記者會。好似中原九龍豪宅及西九龍高級營業董事李子明咁，噚日「牛一」，咁啱又約咗嘉華地產搞嘉多利豪園記者會。中原「一姐」劉瑛琳同埋一班同事們好識做，同場送咗個大蛋糕畀佢，上面寫上恭祝佢「嘉」官進爵，夠晒有心思，連慶賀說話都不忘發展商個樓盤名，果然識做。
另一邊廂嘅中記港島區西半山高級營業董事何兆棠，有事值得恭喜，就係管轄範圍由西半山伸延至山頂同南區，要睇住嘅分行多咗20間。
政府推出投資移民計劃，反應都算唔錯，部份申請重已經批出。因投資移民客主要都係買物業為主，地產代理監管局喺11月26號搞咗個講座，請嚟入境處代表，向代理詳細介紹呢個計劃嘅規則同細節，報名情況好踴躍。
地監局行政總裁陳佩珊話，既然係咁，就開多兩場畀啲代理參加，日期係本周三同本月十五號。早排不斷傳出移民客入市買樓，所以啲代理都希望了解多啲呢個計劃內容，咁到時都知點向啲移民客推銷。
蘭西
電郵地址：
