紅星戀人拍咗拖十幾年，時不時都傳下情變，或者各自有緋聞，但估唔到紅星女友玩得愈嚟愈揚，好唔畀面男友。佢早排喺台灣拍劇同個台灣男藝人傳緋聞，佢當然極力否認，但馮仁昭知呢單嘢係堅嘅，佢不單止背住男友同第二個鬼混，重同個台灣男藝人喺北京公然手拖手行街。
最誇張嘅係，紅星有個朋友撞到紅星女友當街拖住第二個時，覺得眼冤之餘亦好尷尬，諗住掉頭走當睇唔到，費事捲入佢兩公婆嘅感情問題裏面，免得第日紅星女友俾人踢爆嘅時候會入佢數。點知紅星女友主動叫住個朋友，打晒招呼咁，連身邊拖住個唔係佢男友都唔介意俾人知，好彩紅星個朋友都好厚道，冇將呢件事講出嚟。
不過又唔好以為紅星連頂綠帽笠到落腳眼重懵閉閉，佢都知個女朋友好花弗，但每次嗌交嗌到要分手時，紅星女友都一副可憐相喊晒口咁要挽回，話晒都十幾年感情，又共過患難，紅星次次都心軟冇分到手，但就成日鬱鬱寡歡，借酒澆愁之餘重四圍溝女，實行你做初一我做十五囉，計我馮仁昭話，感情最忌拖拖拉拉，唔開心就無謂夾硬喺埋一齊啦。
近日王菲、劉嘉玲同張震等齊集上海拍王家衛套《2046》，噚日張震喺晏晝五點幾收工返到酒店，有一個工作人員陪住佢，着住件軍褸好有型咁落車，張震見到記者影相都冇乜抗拒，重好友善咁微笑，張震噚日開早班，拍到五點幾先收工，都冇疲態，後生仔係捱得住嘅，拍得王家衛嘅戲，耐性應該都唔錯。
張藝謀知道自己執導嘅《十面埋伏》造型俾人偷拍曝光後好嬲，聲言話要告內地某雜誌，呢部戲嘅製片張偉平噚日話：「一定要讓他們受到法律的制裁，某雜誌刊登了照片，又要將照片賣給另一個網站，後者又將照片賣給其他媒體，這是一種骯髒的金錢交易。」至於阿梅記者會延遲，佢就話：「梅艷芳住院是例行檢查，她完全能勝任拍《十面埋伏》。」
楊恭如日前喺北京出席一本雜誌嘅周年慶祝活動，佢着住件火紅tubedress晚裝亮相，性感迷人，贊助商又提供過百萬嘅鑽飾畀佢戴，豔光四射兼搶盡風頭。大會當晚設立現場評選，頒發「最惹火髮型」同「最惹火造型」等嘅獎項，結果悉心打扮嘅楊恭如梗係攞到個「最惹火大獎」啦！再次獲大會頒贈特別設計嘅鑽飾，都可算係又食又拎呀。
無綫昨日公布上周收視，無綫黃金時段三線劇集回落一點，較上星期流失六萬幾觀眾，《西關大少》上周一劇情緊湊，講到主角劉松仁病逝，最多吸引二百五十九萬觀眾（40點）收睇，連帶之後嘅劇集都繼續高企，但劇情交代完劉松仁嘅死訊後，收看觀眾漸漸回落，證明劉松仁先係劇集嘅骨幹，唔知套劇會唔會無以為繼呢？
杜德偉呢排喺上海拍緊新戲《鐵拳浪子》，自從傳佢同女友周汶錡分咗手後，佢都冇公開亮相過，前晚杜德偉同佢大佬杜德智同李樂詩喺上海CarliforniaClub消遣，杜德偉提到情變就好有信心咁話：「我哋冇分手，我聽日返香港六日，一定會去搵佢見面。」杜德偉對呢段情重咁有信心，唔知佢知唔知佢女友嘅反應係好冷淡呢？
富豪風水師陳伯過身之後，佢啲屋企人噚日已經定咗下個禮拜四（十一日）喺香港殯儀館舉殯，陳伯嘅屋企人想低調，但陳伯生前識咁多富豪同娛樂圈中人，到時肯定會有好多猛人去靈前鞠躬，都好難低調。馮仁昭聽講有唔少富豪爭住要包起陳伯個喪禮費用，而佢住養和咁耐嘅費用接近成千萬就係由某超級富豪一個人畀晒。
