近排入到元朗，除咗探吓南生圍嗰條鱷魚仔之外，大家又知唔知喺元朗南面嘅大棠有條坑都好出名？人人叫呢條坑做「神仙轍」，莫非真係神仙嚟過留下嘅痕迹？今日我就要去睇睇，解開呢個謎。
記者：陳震霖
攝影：陳智良
Model：Cindy、Yuko（Space2）
整個行程係喺大棠一帶圍繞山行一圈，所以起點同終點都喺大棠村附近。喺大棠村村口落車後，從大棠村牌坊左面嘅路向楊家古村的方向進發。一路上，見得最多嘅係香蕉樹，上面都掛滿香蕉。原來香蕉花個樣相當趣致，而且據村民講，香蕉花尾端重可以餵豬。
楊家古村已逾百年歷史，古老建築固然唔少，不過最搶眼係村前面有個蘆薈田。「嘩！好多蘆薈呀！」一見到咁多蘆薈，靚女們就差啲想摘返屋企做Facial。咪亂嚟呀，因為呢片蘆薈田係私人財產。再加上有幾隻惡狗喺度巡邏，相信你一入田，佢哋實撲過嚟咬你！
從右邊小路繞過楊家古村後，就會見到指示上山嘅路牌。按路牌指示，向黃泥墩水塘方向前進。走二十多分鐘，沿途夾雜石屎路同泥濘山路，不過總算好走。愈接近山頂，樹木逐漸稀少，這裏係俯瞰元朗市嘅好地方。
沿着山路上坡下坡，又一個小時，傳聞中嘅「神仙轍」終於出現喺眼前。呢度完全冇指示牌，大家記住要留意右面。原來「神仙轍」係兩條十多二十米長嘅深坑，十足古時馬車壓過留下嘅痕迹，其實只係水土流失嘅自然現象，哪來神仙！但坑早就給野草填滿，走近看，原來有六、七呎深，唔小心跌落去都幾傷。
路程行到一半，我哋就會到達「黃泥墩」水塘。你唔好以為呢度冇乜遮掩，企喺度就好熱，但係事實剛剛相反。如果你已經有啲累，我建議你走上堤壩，陣陣涼風就會撲面而嚟，到時個人就會立即爽晒，走多幾個鐘頭都冇問題。
而呢度最出名就係本港獨有、全球最細嘅兩棲類動物盧文氏樹蛙。呢隻樹蛙夜間先會出現，如果大家有幸見到，千祈唔好傷害佢哋呀，係犯法㗎！
走咗幾個鐘，雙腳有啲軟，所以我哋決定過門不入，只係參觀一下大欖自然教育徑入口處嘅古廟。呢間睇落似爛屋嘅廟叫伯公廟，以前係村民去大坑村嘅必經之路。走進廟內，原來依然香火不絕，不過啲祭品就有啲騎呢，竟然連漢堡包都有！
繼續向大棠方向進發，沿住公路行多一個鐘。就會到達大欖郊野公園。呢個公園因為燒烤爐夠多，環境都幾大，假日都擠滿遊人。咦？乜有班年輕人唔用燒烤叉燒嘢食？我走近啲，先發現佢哋原來喺度打緊麻雀。
過咗公園後，我哋發現咗呢個營地。原來唔使預約，隨時都可以入去參加日營，裏面踩單車，滾軸溜冰、繩網等活動樣樣齊，不過最特別嘅地方就係有得釣蝦。釣嘅唔係普通蝦，而係龍蝦。池中嘅蝦有成五、六十隻，最正係一釣到就可以攞去微波爐叮嚟食，原汁原味咁享受。
有駕駛執照嘅朋友又可以去租架高爾夫球車喺營舍附近兜吓風。喺呢間度假村玩餐飽，作為行程結束都唔錯。
保良局賽馬會大棠度假村
地址：新界元朗大棠2411號地段
電話：24781332
收費：
入營：$25（平日）、$38（星期六、日及公眾假期）
釣蝦：$25/半小時
高爾夫球車：$50/1小時（另按金$200）
今日呢段路都幾長，走成五個鐘頭，沿路唔少地方樹唔多，所以要預先準備水同食物，兩手空空嘅話，就要認住呢度啦！喺大棠村牌坊附近呢間培記士多就可以做你嘅補給站。雖然話冇乜特別嘢賣，但係食水同零食就已經幫到你。
交通
去程：由觀塘碼頭乘269C於元朗大棠路落車（$16.5），再去千色廣場附近轉搭往大棠的紅色小巴到大棠村落車。（$4）
回程：回到先前下車的大棠村乘紅色小巴回元朗市中心。（$4）
