飲食人誌：風味炭爐煲仔飯<br>原隻膏蟹今年新作

飲食人誌：風味炭爐煲仔飯
原隻膏蟹今年新作

冬天怎少得一煲熱辣辣香噴噴的煲仔飯？吃罷全身暖笠笠，感到很充實。看着炭爐上的煲仔飯，總覺得這才是煲仔飯的風味。

記者：馬靜兒　攝影：伍慶泉、蔡鴻雯

今日用炭爐燒煲仔飯的已買少見少，部份室內街市的食肆因為街市安裝了冷氣，基於安全條例，已不能再用炭爐燒煲仔飯。在廟街賣炭爐煲仔飯賣了十九年的陳小姐說：「以前我的炭爐一排排擺在街邊，客人聞到香味就自然會坐低幫襯。現在我就要將炭爐安置在附近的工場，客人落柯打就即刻煲。」

屹立廟街
來廟街吃煲仔飯的客人有遊客，也有一般市民。做慣街坊生意，煲仔飯用料不算名貴，但一樣做出和味之作。保留炭爐風味之餘，還每年堅持創新，果然生存有道，難怪在廟街屹立十多年。

也愛創新
「去年就有豬頸肉煲仔飯，今年就用原隻膏蟹，很受客人歡迎。」陳小姐喜孜孜說。不只這樣，興記還加入糯米底，實行來一個糯米煲仔飯，咬落煙韌。每煲都是細細煲，女仔細食都食得晒，真的細心周到。加上脆卜卜的飯焦，你怎能不心動？

原隻膏蟹煲仔飯$40：今年新創的煲仔飯，用原隻膏蟹煲，在芸芸煲仔飯中十分突出，膏蟹鮮味且多膏。(a)

荔茸肉碎煲仔飯$40：將芋頭蒸熟搓成茸，加醃過的肉碎同煲，芋茸加重了味蕾的充實感，肉碎好撈飯。(b)

XO醬鴨甫煲仔飯$50：用XO醬煲仔飯，增加名貴度，XO醬經炭爐燒過，香氣四溢，加上嫩滑的鴨甫份外惹味。(b)

油鴨煲仔飯$30：油鴨不太鹹，有陣陣的油鴨香味，油份滲入糯米飯中，口感豐腴。(a)

麻辣海鮮煲仔飯$50：用上鮮蝦、魷魚和麻辣醬做成，一揭煲蓋麻辣味四溢，海鮮剛熟透，論辣程度不算太厲害。(b)

食客兩句

北菇滑雞煲仔飯$38：平凡的款式最考功夫，雞夠滑，冬菇夠香，加埋加咗蒜油的煲仔飯豉油，很難逃過它的香味誘惑。(b)

窩蛋牛肉煲仔飯$18：將新鮮雞蛋打在免治牛肉煲仔飯面，蛋汁受熱凝固呈半生熟，跟牛肉拌勻，入口濕濕哋，牛肉肉汁加蛋汁散發香味。(a)

臘味煲仔飯$18：最傳統款式，最能食到煲仔飯的風味，臘肉肥瘦剛好，臘腸和膶腸煲到有少少油滲出，很合胃口。(a)

煲仔飯的傳說
明朝時，農夫忙於落田耕種，無閒燒飯，只好把田雞、肉及白飯一起煲熟，然後和其他人一起分享。做法簡單，所以叫做懶人飯。

煲仔飯豉油
其實豉油並不太重要，落豉油是因為飯不夠鹹才加，所以不要整碗豉油倒入煲內。

「膏蟹煲仔飯幾特別，我以前聽都未聽過。」

「我喜歡傳統的炭爐煲仔飯，風味都唔同㗎啦！」

店舖資料
興記菜館（a）
地址：油麻地廟街19號地下
電話：23843647
供應時間：5:00pm-1:00am
註：轉糯米底加$2

新翠華（b）
地址：銅鑼灣登龍街12號
電話：28034801
供應時間：5:00pm-12:00mn