中學同學自加拿大回港度假，十幾位同學喺尖東聚集，偏偏左丁山早有約會，人在銅鑼灣，冇法子分身，真係遺憾。與賓架W、分析L、基金李喺銅鑼灣小南國狀元樓食緊石頭飯之際，手機響起，一聽就俾人鬧：「你做乜唔嚟見吓啲老同學，好大牌喎，即刻飛車過嚟尖東啦……」呢位女士聲音，一聽就知道係闊太富婆L，只有闊太L先至夠膽咁樣鬧左丁山嘅啫，事關讀F3之時，佢與小L坐在左丁山後面，呢兩位女同學特別巴辣，經常用尖鉛筆篤左丁山背脊，有時痛到我飛起，講粗口，兩位L小姐即刻舉手告畀Miss聽：「左丁山講粗口。」當年怕佢兩位怕過冇錢交學費。
小L移民加拿大，大L嫁得好老公，一早發咗達，做善堂總理。所以左丁山唔叫佢做大L，改稱之為闊太。呢晚俾闊太鬧完，問佢有乜貼士，佢話：「有冇買熊豹呀？」當然有啦，佢講過幾次，自己亦醒目，中咗兩次頭馬咯。可惜派彩就少啲。闊太呢次叫買「飛駒」，可惜隻「××飛駒」喺上星期日屈居後備，無緣出場，留番下次啦。
中學同學畢業之後，各散東西，年代日久就好難見得番，唔似大學同學搞校友會，反而經常碰頭，至於小學同學，就更加唔知去晒邊咯。所以CEO盧和總編輯蕭兩位就特別令人羨慕，聽講佢兩位由幼稚園開始就係同學，一路至大學，都係同班，𠵱家就一個做CEO，一個做總編輯，仍然係同事。如此長期關係，實在少有。