恒指又升139點，收12456，距上月高位只差81點。聖誕前後，上見萬三，有厚望焉。
大市喺好短時間內急升，好多窩輪暴漲，唔係個個敢高追。搵平嘢，諗諗中信Call輪9646，昨日只升得1.5仙，收30仙。正股（267）遲早跑快啲，隻輪數據又正，明年3月到期，溢價得1%，槓桿率6倍。正股現價18.10元，升到20元，揸隻輪就有50%利錢到手。3個月內，正股升10%，機會好大。
恒生銀行（011）升1.25元，隻Call輪9911收1.24元，升8仙，又係抵食對象。隻輪明年4月到期，負溢價1.7%，槓桿率8.1倍。就算計埋今次股息因素，隻輪都係買得過，除非認為正股會跌。不過，個市有勢，正股升多過跌。
地產股醒神，長實（001）升2%，升幅細過其他3大地產股，佢啲Call輪可以諗吓。正常輪中，9862同9756非常抵買，平水或低水，槓桿率又唔錯，不過成交一片空白，抵買都冇用。講多無謂，搵食對象不離9065與9074。9065明年3月到期，輪價58仙，溢價5.3%，槓桿率10倍。9074明年6月到期，輪價79仙，溢價5.4%，槓桿率7.9倍。
章盛