近排因為SCEH隻恐怖大作《SIREN》，引起咗一陣恐怖遊戲嘅熱潮，由《SIREN》打響頭炮之後，就到TECMO推出嘅《零：紅之蝶》接力，承接上集嚇到玩家頭皮發麻嘅《零》，今集改由雙胞胎姊妹任主角，向怪異現象挑戰，從CG到遊戲畫面都盡顯製作班底嘅功力。玩完《SIREN》覺得唔夠喉，接住玩《零：紅之蝶》，包你過足癮！
記者：許福合
跟《SIREN》一樣，《零：紅之蝶》同樣以驚嚇及創新玩法為賣點，兩者推出相差唔夠一個月，玩家自然會拎嚟作比較。睇畫面，《零：紅之蝶》實有較佳質素，唔玩血腥，只以氣氛嚇人，遊戲內主角都設計得相當精細，尤其主角兩姊妹，雖屬靚女一名，不過一啲都唔會減低遊戲驚嚇程度，而且大部份場景都非常陰暗，直至當玩家搵到手電筒，情況先至有好轉，不過單靠方向感認路都唔容易，小記最後嘅解決辦法都係校光啲個電視，咁就一清二楚！
《零：紅之蝶》嘅玩法與一般恐怖遊戲都唔同，唔使打打殺殺，間中鬼魂雖然會突出現，例如一開始要對付嘅女鬼，就喺主角開門時突然喺門後現身，因為全冇先兆，實令人嚇咗一跳，其他時間因為右下角設有靈體探測器，附近有鬼魂就可預先知道，設計雖然方便，但就令到遊戲「驚位」少咗啲。見到主角嬌滴滴，就知道動手動腳唔使預佢，遊戲內主要使用一部有消除靈力嘅古老相機作武器，可將鬼魂攝走，所以當探測器有反應，記住拎相機出嚟周圍照一照，實有着數。
玩過上一集都會記得每次只會面對一個敵人，新作就要玩家同時對付1~4個，遇到呢個情況，好漢不吃眼前虧，最聰明都係邊打邊逃，逐個擊破。遊戲中途重會搵到唔少相機配件，好好利用能有更強攝敵能力，面對4隻鬼都唔使驚！玩呢類型冒險遊戲最驚係搵唔到路走，地圖雖然大，不過分叉路唔多，加埋地圖資料詳細，附有相片及以藍色標示門口，輕易可分辨到未去過嘅地方，相當好用。另外，任何地方都記住要作地氈式搜索，部份道具會收藏喺玩家視線之外，勤力啲搵，分分鐘會執到寶。
遊戲類型：冒險
對應機種：PS2
遊玩人數：1人
製作公司：TECMO
行貨售價：$342
(C)TECMO,LTD.2003