情侶表永遠有市場，癡男怨女爭住買，為咩呀？孖公仔一人一隻互表心迹兼晒畀人睇囉，但情侶表價錢永遠唔啱情侶心意，名牌手表唔係人人豪得起。不過奇迹今日出現，有表行老闆專誠向CASIO廠商班咗批情侶手表，街坊價一律賣$99，另外G-Shock、Baby-G同樣平到笑，今日唔掃等幾時呀。
記者：何善華 攝影：黃子偉 模特兒：Yannes（Imagine）
CASIO手表唔係低檔貨，齋睇牌子已經係信心保證，加埋有原廠保養，1嚿水1隻確實吸引，聖誕節快到，重未諗到買乜禮物𠱁女朋友？就買對情侶手表喇，絕對物「輕」情意「重」，諗得過。
寶藍色表面，任何場合都啱戴，膠鋼表帶大玩Mix&Match，永遠唔覺Out，走針顯示大方得體，唔會太過花喱碌，情侶戴出街唔會嚇親人，男裝有日期顯示，約咗女朋友無藉口失約嘞。
原價$350 特價$99一隻
雖然唔係正式情侶表，但老闆話好多懶恩愛嘅情侶都鍾意一人一隻戴住嚟晒命，建議男仔戴金色，女仔戴銀色，表身輕薄，數字顯示屏，輕巧唔累贅。
原價$248 特價$99一隻
Baby-G走年輕人路線，功能唔使多，顏色夠搶先係賣點，BGF-130V多咗瓣記憶傳送功能，但只限於同款型號，玩多過實際用途，有藍及灰2色選擇。
原價$650 特價$398
淺藍色膠表帶，有預測各地城市溫度的數據功能，備有各地世界時間，6折開倉抵到爛，表面細，啱女仔戴。
原價$648 特價$398
珍珠白表面，同樣備有預測各地城市溫度數據及各地時間功能，珍珠白色少見，有珍藏價值。
原價$798 特價$580
G-SHOCKDW版重出江湖，推出復刻版DW002首度登場，多功能設計包括時間倒數、響鬧、計時、夜光等，表帶可隨時更換，盞鬼。
原價$598 特價$380
用嶄新嘅光動能儲存能量，毋須入電芯，遇熱即自動收集能量，有能量剩餘顯示；同時備有世界時間、防水200米等功能，鋼表帶設計一樣襟興。
原價$1,080 特價$650
今季最新款的GH系列款色，基本上每一代GH外形都一樣，但功能就每次都例牌加多一兩項，今次就有太陽能顯示、自動夜光、兩地時間等，黑色GH系列如無意外應該最受人歡迎。
原價$798 特價$498
透明湖水藍色，望落好舒服，同樣有太陽能顯示、電話簿記憶，百搭湖水藍色，襯乜衫都掂，戴隻表出街當Fashion都重得。
原價$848 特價$530
G-SHOCK少有的黃色款式手表，響鬧、計時、兩地時間、防水200米等功能齊全。
原價$798 特價$498
石英表一直是男士們至愛，日本製，鋼帶設計百看不厭，有防水功能，簡單易用，女士們睇定呢隻送畀有心人，一定無衰喇。
原價$268 特價$99
CASIO特別走成熟穩重行政人員路線嘅MT-G，701型號備有E-Data記憶、世界時間、計時、響鬧等功能，鋼帶表設計深入民心，半價割喉推出，限量10隻，有買趁手。
原價$1,080 特價$540
真皮表帶外形夠酷，有防水功能、指南針外盤，備有藍、啡、白、黑4色任揀，秋冬行山啱戴呢隻，蕩失路靠隻表都搵到路走。
原價$389 特價$99
功能多到爆棚，啱晒爬山一族佩戴，有氣壓測量、溫度計、距地面高度測量（最高4,000米）、指南針、自動夜光、防水100米、超過30個世界時間……要一次過讀出所有功能的確唔易，買隻返屋企慢慢研究喇。
原價$1,180 特價$698
售賣點：IN-WATCH
地址：旺角信和中心地下36號店
電話：23889963
營業時間：12:00nn至10:00pm