個市又再炒上，恒指上周五收12317，同11月初最高比較，只差220點，幅度不過2%。落後藍籌要數和黃（013），現價56.75元，低過上次高位5.75元，差幅高達9%，三G前景問題已漸淡化，有機會炒落後。
搵和黃Call輪炒，現時最有爆炸力嘅係9914，主角係佢，行使價55元，啱啱由價外輪變為價內輪，升起上嚟，可以好犀飛利。數據亦靚，重有逾個半月壽命，輪價39仙，溢價3.8%，槓桿率14.6倍。遠期輪中，9058亦唔錯，明年7月到期，輪價62仙，溢價7.8%，槓桿率9.2倍。
上周五國企指數跑贏其他指數，紅籌國企一家親，紅籌股睇落亦唔會衰得去邊。有隻紅籌Call輪好低買，就係華創Call輪9868，聖誕前到期，輪價1.66元，負溢價1.2%，槓桿率5.5倍。負溢價係因為輪價未跟貼正股（291），但遲早會修番正。如果平水，隻輪值1.77元。
博9868，固然係希望由負溢價變為平水賺嗰7%，更希望正股上升帶動。正股9.05元，上周五轉強勢，年底興炒紅籌，做窗櫥裝飾。喺隻輪到期前，正股升1成見10元齊頭唔係冇可能嘅事，咁嘅話，隻輪就值2.70元，有63%潛在升幅，聖誕大餐與禮物全部有着落。
章 盛