律政司司長梁愛詩同歌手梁詠琪，噚日去咗米埔出席「第十一屆米埔環保行」嘅開幕典禮，佢哋兩個唔知係咪同姓三分親，所以整個活動都雞啄唔斷。
噚日天朗氣清，有唔少一家大細，拖男帶女去米埔觀鳥，親近大自然，其中有男士帶同年約七、八歲嘅囡囡走去睇熱鬧，中年男士猛叫囡囡走上前同梁愛詩一齊影相，但可能小妹妹根本唔知梁愛詩係邊個，小妹妹一邊影相，一邊𢱑「鼻哥」，個樣重好疑惑㖭，雖然小妹妹咁唔畀面，但梁愛詩依然發揮佢嘅親民態度，用手搭住小妹妹膊頭合照。
梁愛詩親民，早已經出晒名，當年佢決定唔告胡仙，夠話係驚累到星島執笠，新聞從業員要失業揸兜，有個咁為打工仔設想嘅司長，真係香港之福呀。
（圖）梁愛詩噚日出席環保活動，用手搭住小妹妹膊頭合照。 陳慧安攝
傳真︰2623-9278
電郵︰