上星期五至星期日，接手韓國現代汽車代理權嘅仁孚行，首次替全線車款舉行大型車展，兼且重有多場FashionShow助興㖭！夠瞄頭之餘，難得擺開歐洲車展嘅場地，今回有韓國車首次踏足，真係全賴仁孚行嘅後台實力雄厚㗎！據知，三日車展吸引到唔少車迷到場參觀，除咗車款夠齊之外，個別型號嘅製作水準重直逼日本車，加上咁超值嘅賣價，又確實有一定號召力呢！
至於話新代理嘅售後服務方面，一如亞Mark早前透露，仁孚行經已響九龍荔枝角物色到合適嘅地方，大概響明年1月初，全新現代汽車嘅維修中心，便會正式開幕，佔地面積夠大之餘，又勝在位置靠近地鐵站嘛！然而，舊有現代車主若然要維修部車的話，現階段仍然照舊，可以送部車到原有位於牛頭角嘅維修中心，直至今年12月底啦！