眨吓眼,聖誕節話咁快就到,大使呢排都四出搜羅聖誕禮物。不過,大使點都唔及身邊一位媽媽級嘅朋友誇張,佢為咗買聖誕禮物𠱁佢寶貝仔,使咗成一萬蚊,證明香港貧富懸殊問題好嚴重。
根據香港社區組織協會最新嘅調查顯示,以聯合國嘅標準,𠵱家香港有超過三十五萬名兒童生活喺貧窮線下,呢個數字都咪話唔驚人,大使喺工作上,就經常接觸到呢類小朋友,明仔係其中一個。
明仔今年五歲,係新移民,爸爸因為有外遇,離開咗佢同媽媽,明仔喺香港未住夠一年,唔合資格申請綜援,𠵱家兩母子就靠媽媽一份一千六百蚊嘅綜援金生活,佢哋住幾十呎板間房,屋企冇電視、冇雪櫃,更加冇玩具。明仔平日最大嘅娛樂,就係廢物利用,同媽媽一齊喺街上面收集人哋丟棄嘅宣傳單張,摺紙飛機玩。
大使早排就透過蘋果基金「童夢成真」行動,送咗一盒玩具車畀明仔,佢不知幾開心。大使真係好希望趁聖誕節,可以令多啲家境唔好嘅小朋友開心啲,唔知各位善長仁翁點睇呢?
「童夢成真」專戶捐款編號:C0121
暖流熱線
電話:29908688
傳真:23702192
電郵:
網址: