日本偶像歌手濱崎步，雖然人氣已不復當年，但佢前日喺大阪舉行嘅「BestHit歌謠祭2003」內大出風頭，破天荒連續四年成為「流行曲部門」大獎得主。咁啱前日出版嘅日本爆料雜誌《BUBKA》，就刊登咗步姐七年前為一本年輕人時裝雜誌做化妝模特兒嘅相片，佢嗰陣個樣娘到爆之餘，更惹人懷疑步姐整過容㖭！
濱崎步喺九五年未紅嗰陣，曾經同當時一樣冇乜人識嘅酒井美紀，一齊做過某本日本年輕人時裝雜誌嘅模特兒，兩人都親自上陣教人化妝。當時步姐個樣，唔少人都話有啲似安達祐實，睇落清純得嚟又幾鬼娘炳，佢個頭比起𠵱家更加大更加圓，個鼻哥又大又扁，對眼又冇𠵱家咁精靈，連雜誌《BUBKA》都懷疑，𠵱家嘅步姐靚樣，係咪做過手腳。
步姐當年喺雜誌入面教人啡色同粉紅色化妝外，又示範點樣畫眉，表現得非常投人，娘得嚟又幾可愛。不過，佢唔單止着埋啲娘到爆嘅套裝拍照，重身穿一套好似內衣嘅短袖衫同短褲，再加一對拉到上大髀嘅襪套影相，相信今日步姐自己睇番都會覺得慘不忍睹喇！