88年加入東海時，陳偉雄才16歲，當時他在廚房做打雜工作，行內人叫「細路」，在今年沙士後，人心仍未穩定時，他獲鍾錦提升為高級行政廚師，剛踏入30歲便一個人負責東海集團旗下9間分店的廚房運作及人手調配，他的成功之道是：「虛心學習，對自己有要求」。
一些轉職的新同事，在其他食肆學到不同的烹飪技術，陳偉雄會虛心請教，「我（職級）係大過你，但我唔識你咁整，咪要學囉，唔識就要學，大家研究，無話做大就啱晒」。他習慣每天反思，「每一日收咗工，唔係話淨係返去瞓覺，好多嘢係要諗番今日有咩嘢錯」。
鍾錦的門生眾多，但對陳偉雄青眼有加，原因是陳偉雄凡事都向自己負責，「做嘢好與唔好，都係向自己交代，唔係為咗人哋做嘢，係為自己做嘢。我唔會為咗喺你面前，表現畀你睇先至做，我想自己做好嗰樣嘢，做畀自己睇，如果你係做畀人睇，即係好似做戲咁」。
雖然對自己有要求，但在專業角度與客人口味之間，陳偉雄可以輕易作出取捨，「始終這行是顧客至上，佢入得嚟消費，當然想食佢希望食嘅嘢，呢個係佢入嚟嘅原因，我哋就要畀到個服務佢」。
入行多年，陳偉雄已有自己的管理哲學，就是以身作則，即使貴為高級行政廚師，他仍然堅持每天落廚，目的是「唔使用言語，就起到帶頭作用」。從事廚房工作十多年，最令他沮喪的是：「試過做一個餐，做得好好，但做番嚟無錢賺，當時環境唔好，只賣2186元，得個做字」。