噚日宏億置業喺西貢銀線灣廣場開分行,請到市區重建局主席劉華森,同新界總商會永遠榮譽會長張人龍等嚟做剪綵嘉賓。聽劉主席講,佢係西貢街坊,就住喺廣場附近自己起嘅清雅苑,噚日嚟湊吓熱鬧,而且以前同張人龍都係立法局議員。
至於張人龍呢,原來佢係宏億置業嘅老細之一,重係大大份嗰隻㖭噃,唔怪得要親身嚟為第二間分行剪綵啦。另有電視台長青樹之稱嘅胡楓,因為係老細之一方國珊嘅契爺,所以嚟剪綵恭賀一番。
講番市建局,劉華森話明年會搞幾十個復修項目。佢感慨咁話,約四十年樓齡嘅北角邨已夷為平地,因為冇妥善保養先搞到咁殘,其實復修之後重可以用好耐㗎。而灣仔莊士敦道重建項目可望明年推出招標。
佢又話,若今年底前,可以收埋大角嘴櫻桃街剩番嘅少少業權,同埋荃灣楊屋道聯繫地盤補價批出,就可以齊齊喺明年推出招標嘞。
新世界同泛海合作嘅旺角單幢住宅別樹華軒,百零個單位,但宣傳攻勢絕不遜於大型盤,新世界營業及市務經理黃浩賢透露,樓盤今個禮拜添多兩個全新示範單位,分別係十一樓A同二十七樓B室,連同早前開放嘅兩個,總共搭咗四個示範單位。
別樹華軒現時僅餘約二十幾個貨尾,發展商仍肯落本,皆因餘貨呎價由之前嘅三千四百蚊,加到三千六百到四千蚊,若果賣得出,就點計都有賺啦!
中原測量師行董事總經理黎堅輝話,公司喺內地發展模式係以點對點方式擴展,𠵱家喺北京都設有辦事處。為擴大業務範圍,會增聘人手,單是本港已要倍增至二十人,更會破天荒請外國人加盟,係中原集團二十幾年首次喎,𠵱家就計劃喺澳洲大學請啲建築學系嘅實習生,希望佢哋可以提供新思維設計。
佢透露,𠵱家公司喺內地業務,主要做樓盤銷售等方面嘅工作,日後希望可以做埋小區規劃同戶型設計等業務。
跨區換樓個案好多,但由住居屋變住洋房,市區轉入郊區就比較少見。香港置業康怡分行經理司徒偉文講,一名住樂富居屋嘅印尼華僑,以三百四十二萬,買入元朗四季雅苑一座雙數洋房,三套房設計,面積一千二百八十方呎,另有前後花園、天台同車位。
司徒偉文透露,呢名華僑諗住換樓,先後喺將軍澳同港島東區睇過五六個屋苑,其間俾公司同事游說佢睇四季雅苑,結果一見傾心,促成交易。呢位華僑喺香港住咗好耐,自己搞生意,又識揸車,所以就算住遠啲都唔怕。佢重話第日會介紹印尼親戚買樓。
美聯精英會日前到上海考察,為期三日,拜會咗幾間發展商,睇吓當地房地產市場嘅運作,咁啱集團主席黃建業又喺上海公幹,於是約埋去上海城市規劃館參觀,了解當地房地產嘅發展模式同未來動向。唔知黃主席對開拓上海市場嘅最新睇法係點呢?
另一邊廂嘅中原,就半年內第二次派前線同後勤員工,參加七日六夜「龍騰飛躍鍛鍊營」,學習團隊精神、溝通技巧同鍛煉鬥心。
蘭西
電郵地址: