暴躁女星拍拖冇次拍得長，其實都唔怪得人，因為佢自己做人嘅態度亦好有問題，記得早排佢喺內地同某天王合作拍戲，佢晚晚收工咁攰重要坐兩粒鐘車出市區蒲吧，真係唔到你唔服。有晚佢喺一間卡拉OK房消遣，點知有幾名大漢走入嚟同佢敬酒，啲大漢借醉唔肯走，暴躁女星開始火起同佢哋嘈起嚟，嘩！原來佢都好粗口吓！
暴躁女星睇唔出都真係幾夠膽喎，對住啲惡漢都唔怕，重以大家姐口脗手指指同啲人講：「我不簡單的，你們最好立即在我眼前消失，如果你們到香港××街，我會給你們好看的。」卡拉OK啲經理知佢係香港紅星，怕搞出事會好麻煩，所以出面調停打發班惡漢走，第日佢開工嗰陣，重講番成件事出嚟，以為自己好威，而天王聽到都搖晒頭。
鄭伊健噚日去咗會展出席佢做代言人嘅相機宣傳活動，廣告商少不免會送啲相機畀伊健玩吓，佢女友梁詠琪係另一牌子相機代言人，問伊健會唔會同女友交換相機玩吓，佢竟然話：「冇㗎，我自己咁多機，而且我覺得Canon係最好嘅。」伊健咁識擦廣告商鞋，但唔覺意踩親女友代言嘅相機，唔知會唔會俾人扭耳仔呢。
麥家琪前晚喺九展出席「周漢興龍獅總會成立三十五周年晚會」，麥家琪早前被人喺屋企附近貼大字報辱罵，佢話：「啲人真係好低莊，我又冇得罪人。」佢重話：「我見到啲鄰居唔會烚熟狗頭咁打招呼，我住嗰度係條斜路，有時見啲人行得辛苦車埋佢哋，點知下次見到我好似唔識咁。」咁斷估都唔會因為咁變埋仇人啩！
曾演出《爆裂刑警》、《新紮師妹》等電影嘅性格演員李耀明，個多月前因腦癌喺醫院病逝，終年四十七歲。由於佢喺長洲大，喪禮亦選擇喺長洲舉行，早前其遺體已火化。馬偉豪噚日接受電話訪問時就話：「佢（李耀明）係一位好出色嘅演員。而且佢四十幾歲就病死，我真係覺得好難過同可惜。」
盧巧音噚日去咗銅鑼灣出席新城娛樂台《唱K學國語》活動，現場有約四百名參賽者，其中有歌迷將盧巧音認錯做何韻詩，佢即時黑面，重話：「係呀，我係何韻詩。我同阿詩把聲都係咁沉，幾似㗎。」呢件事就證明咗盧巧音平時嘅形象唔夠鮮明，好應該趁機檢討一吓啦。
陳錦鴻同滕麗名噚日喺九龍城拍新劇《心靈雞湯》，之前佢都話過同女友杜雯惠將會忙完晒手頭上所有嘢後，立春就可以結婚。佢同記者講應該冇問題，重話想生BB，講到口水都流埋咁滯，恨做爸爸恨到出晒面。佢話：「差唔多啦，係時候生仔女，我都三十幾四十歲，生到梗係最好生啦！」咁又係，再遲可能有心冇力啦！
