港股表現之強，出乎大部份人士意料之外，在調整到11660水平，在50日線獲支持便掉頭回升，並重越12000大關、10日線同20日線，且有向前高位挑戰之勢，甚至更有可能在12月創出今年新高。港股今次升市，係由資金主導，因此走勢比一般人預期強得多。
今次調整，恒指由高位12537回落到11661便止跌回升，跌唔夠900點，走勢上有機會重演今年7月（在10000點水平）和9月（在11000點水平）的橫行調整，雖然目前大市仍未擺脫中期調整的格局，形態上亦有可能演變成頭肩頂的利淡形態，但若升破12537的高位（當然有大成交支持更佳），便可確認調整完成，再展升浪。港股由4月開始的升市，好大機會升到年底。
資金主導的升市，由基金話事，所以佢哋對後市好有信心，特別係個別貨源歸晒邊的股票（好似國企同中資股），真係要升幾多就有幾多。
今次升市，雖然已升逾4200點，而調整亦已出現，但調整可以有好多種方式，橫行（幅度不足、時間搭夠）即係其一，芬佬已一路提示唔好睇得太淡，特別係唔好造淡，原因係基金同大行今次全情入市，揸重貨，大市在12000點水平整固後，只要外圍配合，升勢就會再起，甚至向13500至14000推進。
基金股呢輪紛紛發圍，上禮拜四、五兩日，又見到大行排隊掃入聯想集團（992），股價亦由低位回升。雖然聯想中期（03年9月底止）業績表現未如市場預期般理想，但由於股價已由高位回落頗多（由3.8元跌到3.1元），而科技行業復甦之勢近期明顯轉強，基金因此而重新看好聯想前景，聽聞短期內會有推介。
美林早前已發表報告，將聯想評級由「中性」調升到「買入」，目標價為3.8元。
聯想上周五高收3.35元，上升0.175元，升幅5.5%，一舉而升破10日、20日同50日平均線，多種圖表訊號亦轉強，短線上升目標係3.8元，整固後再上，要到4.4元才有阻力。
郭兆誠