又到12月，年尾流流小初本來想搵經紀陳研究有邊隻股票會有櫥窗粉飾行動，但佢就話中國數碼信息（250）可能翻炒，不妨留意。其實佢個仔南海控股（680），早排亦炒過一輪。
小初記得，中國數碼信息喺去年年尾，失驚無神由0.035元水平，一條氣抽上0.213元，雖然期間公司冇乜嘢大動作，但仍然炒得好勁，小初當時覺得班幕後炒家確係神乎其技，不過自己就冇參與買賣，只係做旁觀者。
但踏入今年之後，雖然隻股股價冇大散，但成交就明顯細咗好多。直到上周二，中國數碼信息出現一批為數4.1億股，造0.171元的大手成交後，股價同埋成交就開始郁動。
經紀陳話，此乃中國數碼信息開車先兆。至於實際炒乜嘢？佢話其實莫需有，總之有水到，想點炒都得。
中國數碼信息上周五升5.1%，收0.204元，成交股數1.18億股，金額2354萬元。
究竟今次隻股會否重演去年勁升的走勢？真係要拭目以待。
慕容小初