列斯上周六終於「止血」，聯賽作客一比○挫查爾頓，而同日英格蘭喺世青盃分組賽爆冷一球不敵日本。兩者有何關係？就是繫於小將米拿身上。
列斯小將米拿日前幫球隊取得致勝入球，但佢原本入選英格蘭參加世青盃，點知列斯拒絕放人，國際足協會長白禮達就炮轟球會冇畀機會年輕球員參加大賽。結果，米拿就真係成為列斯贏波功臣，但英格蘭被睇好之下，輸畀日本，認真無面。
其實，英格蘭重有加利奧尼爾呢位喺英超聯上過陣球員，但佢效力個隊樸茨茅夫畀佢走結果主場輸畀李斯特城兩蛋。不過，話晒米拿鬥心強，對陷水深火熱兼士氣低落嘅列斯好緊要，列斯高層呢次真係棋高一着囉！
衰到貼地嘅英甲球隊巴拉福特終於有粒幸運星，就係佢哋嘅新領隊白賴仁笠臣。佢上周六嘅首次領軍，竟然上半場落後兩球之下，下半場連入三球；而最後嗰球更係喺完場前𡁻入，終於以三比二贏咗客軍米禾爾，係十三場聯賽以來首場勝仗，你話係咪笠臣腳頭好呢！
皇馬前日朝全場係咁俾主隊奧沙辛拿圍攻，靠朗拿度做救世者搶番一分，之但係成日喊走嘅古迪成為另一個焦點，因佢賽前練習時同沙加度講手，對奧隊時又俾碧咸唔覺意撞親，搞到厲住萬人迷，碧咸可能知佢心情差，就摸吓佢塊面，好似𠱁個仔咁，否則古迪郁佢都似。
聽聞𠵱家重喺大陸𢱑緊銀嘅馬拉當拿，因為要向意大利政府繳交二百萬英鎊（約二千六百七十五萬港元）稅，有意喺呢個月返去拿玻里嘅聖保羅球場踢表演賽籌錢，而且會有佢𠵱家踢緊拿玻里青年軍嘅私生子助陣。我求大俠就認為要班球迷幫佢籌錢幾過份，你估人哋欠你嘅咩？
歐洲足協計劃歐洲各大聯賽球證溝亂執法，以杜絕球證打假波，但係我求大俠就有啲保留，因為啲球證舟車勞頓不特止，重有語言隔膜而且執法尺度唔同，球員同教練都無所適從，隨時愈判愈亂。不過意甲佩魯賈會長加奧治就舉腳贊成，唔知班意甲球證會唔會唔like佢呢？