區議會選舉後，左丁山碰到幾位資深商界人物，竟然苦口苦面，怪而問之，佢哋都話：「怎麼辦，怎麼辦，董生以後更綁手綁腳啦！」哦，原來佢哋驚民主派聲威大震之後，所有立法會議員都會變成反對派，董生嘅政策就無法推行，特區政府成為徹頭徹尾嘅跛腳鴨。左丁山對佢哋講：「假設中央換人得唔得呀？」佢哋都認為：「邊個肯做喎，第二個會叻啲咩？」
邊度會冇人做呀，吳先生就有意思啦。據曹仁超講，吳先生「五有」，有頭腦、有才能、有意從公……如果有空缺，吳先生實會當仁不讓，至於佢會唔會比董先生好啲或者差啲，要做過先至知。
編輯K睇完曹仁超專欄，笑笑口話：「如果吳先生做特首，香港人咪又坐艇？佢要識掌舵喎？」何出此言？編輯K話：「董先生係船王之後，吳先生係船王女婿，佢兩位領導我哋航行，咪即係帶領我哋坐艇？」此乃純屬巧合，不足為據，而且這船王搶購九倉，成功登陸，女婿吳亦成為地產商，冇繼續坐艇，應該穩陣啲啩？
無論誰人接任，都應該經過理性討論，唔好學徐大炮亂咁放炮，佢鬧香港電台成日鬧政府，等同餵毒藥畀市民食，害死民建聯。徐大炮大概鬧港台鬧到上晒心，忘記咗重有兩個惡人更厲害，就係鄭大班與黃毓民，呢兩位先至係民建聯嘅「毒藥」，徐大炮炮炮虛發，徒然浪費時間，好心佢以後聽吓鄭大班與黃毓民點樣句句攞命啦！