區議會選舉民建聯重創，土共火都嚟埋，講嘢開始「𦧲脷」，好似撞鬼一樣。港區人大代表王敏剛，噚日喺城市論壇話：區選嘅投票率，只係有四成半，即係有五成半選民冇投到票，阿董委任區議員，完全可以委任落選者，應該反映埋嗰五成半冇投票嘅選民嘅意向。
既然冇投票，又點知呢五成半選民想邊個做？阿董從何去揣摸佢哋嘅意思？話唔定冇投票嗰五成半選民，係想肥彭返嚟做特首，不如就呢個問題，委託吓港大嘅民意調查機構做番個調查？
五成半人冇投票，即是佢哋嘅意向無效，無效即是冇得計。如果王敏剛咁富有創意嘅民主理論成立，咁上次美國總統選舉，夠一樣只係得五成投票率左右，其中投票畀共和黨嘅更加少，咁咪豈不是除咗布殊之外，重應該委任埋戈爾做第二總統，由布殊管東岸，戈爾就喺西岸話事？
反二十三條，得五十萬人遊行，有五百五十萬人冇上街，點解董班子又死死氣收回草案，唔反映吓嗰五百幾萬人意願，強行三讀？
王敏剛嘅眼光同IQ，本來都唔係咁突出，否則佢唔會無厘頭喺大西北嘅敦煌起五星級酒店。富豪團年前大西北商機無限自由行之旅，又話投資呢樣嗰樣，結果冇晒下文，到咗今時今日，都係剩番王敏剛嗰間酒店喺度落日照大旗，證明有啲說話，冇人敢噏，佢王少敢，好多生意，冇人敢做，淨係佢肥仔剛敢作敢為，寧願蝕本，都要證明自我，可見呢個世界，確係要有人去做踩地雷嘅敢死隊。
側聞區議會選舉，民建聯輸晒，土共條氣唔順，要部署大反擊。王敏剛搶先瞓身挺委任，可能講出咗阿董嘅心聲。八方日前都講過，阿董係好想委任番葉國謙班人入去嘅，不過葉國謙入得，長毛亦係落敗者，亦一樣入得。王敏剛既然想玩到咁大，香港人一定奉陪。
有好似鄔維庸、王敏剛呢一類新進嘅跛腳土共笑住幫阿董抬轎，行緊萬丈懸崖邊，又有乜法子唔腳腳叉空，搞到阿董連人帶轎跌落萬丈深淵！
傳真︰2623-9278
電郵︰