梅艷芳患了子宮頸癌後，一直勇敢地與癌魔戰鬥，努力投入工作，早前她剛開完八場個唱，前日又從日本拍畢廣告回港，但昨日傳出阿梅病情轉差，曾到醫院檢查，而原於後日舉行的《十面埋伏》記者會亦要取消。
梅艷芳雖然患上子宮頸癌，但她仍然堅持演出張藝謀執導的《十面埋伏》，張藝謀大受感動，所以在阿梅前往北京開工前，於後日特別為她舉行記者會。不過昨日投資該片的安樂電影公司宣布取消記者會，有傳聞指原因是主角梅艷芳身體不適，昨日由日本拍完廣告回港後病情有變，要入院接受治療。
雖然阿梅早前曾透露身體已好轉，但不知是否剛開完八場演唱會，又要坐飛機到日本拍廣告，故此變得勞累，昨日有傳她感到不適，要到養和醫院檢查，對此阿梅助手Marianne昨日接受電話訪問時說：「啋，佢喺屋企呀，邊有事呀？佢喺日本返嚟，兩點幾去機場，搞到成十點先落機，係人都攰啦。」提到《十面埋伏》記者會取消，Marianne說：「劇組嗰邊打嚟話要延期，好似係話有啲調組問題，金城武都去唔到，先要延期。」據知阿梅原定於十二月六日北京開工，Marianne說：「我哋都未知幾時去，阿梅呢個月都留晒畀佢哋拍戲，𠵱家等緊通知囉。」
而安樂電影公司發言人陳小姐昨日亦解釋說：「我哋接到劇組通知，話暫時未準備好，記者會需要延期，至於延到幾時，就要等劇組通知，至於你哋所講嘅阿梅因病情有變，記者會先會取消，呢啲只係傳聞，我從未聽過。」
對於Marianne指因金城武延期，金城武的經理人公司發言人陳小姐則說：「金城武一早已通知咗冇期出席記者會，佢要留喺日本拍廣告，電影公司喺禮拜二嘅記者會一早都冇預佢。」