有時啲日劇迷話鍾意睇日劇多啲，係因為日劇拍得認真，睇吓以下呢個case，就知道日本人製作真係幾咁認真。最近有個日本AV女優紋舞出碟，就扮晒人氣偶像松浦亞彌嘅造型，仿真程度真係堪稱一百分，我羅拉齋睇佢封面嗰幾個松浦經典造型，真係笑爆嘴要縫針咁滯！
查實呢位紋舞姐以前已經扮過松浦一次，今次係食過翻尋味拍第二輯，而且去得更徹底，剪個松浦最新短髮，模仿松浦兩個紅茶廣告、兩個舞台造型，同水着寫真集入面嘅招牌look，表情同造型都係一絕。連髮型嘅分界、眼神同埋個造型都抄到足，真係令羅拉好佩服。其中水着寫真裏面個揸住水槍look，都似到十足十。
唔單止咁，每件道具都造得同原來廣告一模一樣，如果佢話係松浦借畀佢嘅話我羅拉都一樣信！就連松浦揸住嗰支「午後之紅茶」，都俾佢改咗做「紋舞之紅茶」，難怪隻碟一出街咁多人講。
當然，我唔係喺度鼓勵松浦嘅fans去買隻碟嚟睇，始終碟入面嗰個唔係佢哋偶像，但有人翻佢嘅造型，而且重俾咁多人討論，都好強勁啫！