碟場喺大節前夕嘅通症——冇大片出！可幸臨星期尾爆咗隻《盜墓者羅拉：生命之匙》，睇牌頭有安琪蓮娜祖莉，加近7億港元製作費，真係好「一級」猛片；不過改編自「電腦遊戲」電影嘅通病，一味打到上天下海，故事內容則比較貧乏！但如果換轉一個角度，當佢《XXX反恐暴族》咁睇動作，亦不失為一套度周末好片。
記者、攝影：谷田
安琪蓮娜祖莉今次已經係第二次飾演羅拉呢個角色；上次嘅戰衣係傳統嘅熱褲加白色吊帶背心，今集都有一件激「凸」嘅銀色連身潛水衫，相信祖莉姐嘅影迷應該冇乜投訴了！
硬係覺得第一集，祖莉姐要喺動作上做到似羅拉，所以一味「打拳頭交」又左爬右爬，睇見都好笑；今集《生命之匙》改以上山下海，動作掛帥，可觀性就大好多！一開場先嚟一個水上電單車亡命表演，再嚟就係「海底奇兵」式大戰食人鯊魚，雖然睇得出係CG嘢！不過亦無減可觀性！
今集故事內容講述羅拉喺深沉海底嘅月亮神殿，無意間發現了記載有潘朵拉寶盒收藏位置的水晶球，之後不幸被任達華所飾演的黑幫頭目所搶奪；由於潘朵拉寶盒隱藏着毀滅世界的力量，所以羅拉不惜任何代價，都要搶奪這枚水晶球！由於第一集電影票房狂收，所以今集嘅拍片經費都寬鬆好多，有7億港元畀製作人員狂花，而電影嘅「世界」觀亦大好多，拍攝場境橫跨歐洲的希臘威爾斯、非洲的肯雅同亞洲區的中國和香港！齋睇場境，已經好過睇《寰宇風情》！
當中最引起大家興趣嘅，相信是喺香港拍攝的幾幕動作戲；一是銅鑼灣時代廣場，竟然俾羅拉搵到個樓高十幾層嘅「地下商場」！然後再喺裏面摷到國際犯罪組織嘅生化工廠，香港人睇番真係幾爆笑（或者冷笑）！另一幕是袓莉姐喺尚未落成嘅中環國際金融中心，用降落傘飛渡維多利亞港，一級製作嘅國際大片以香港取景，香港人自己睇番真係有一股難以言喻嘅親切感！
羅拉識打麻雀？
點都估唔到羅拉識打麻雀！係Bonus嘅刪剪片段中大家就有得睇嘞，都算入鄉隨俗；而且羅拉重要係叻到要教人嗰隻，真係完全估佢唔到！
羅拉正正MTV
Bonus裏面重收錄有羅拉的主題曲《Korn"DidMyTime"》，裏面啲電腦特技都玩得好出神入化，可以一睇。
店舖：DVDPRO
電話：23326326
地址：旺角奶路臣街6E德發商場地庫B4舖