星期一（二十四號）講「自由行自由搵食」，貿易梁睇到陰陰笑，跟住同左丁山講：「自由搵食嘅靚女，𠵱家周街都係，你去尖東某某酒店打個冷，包你睇都睇唔切。」投資陸講：「啲自由靚女落嚟自由行，行行吓就行咗去尖東開房，以遊客身份卜房，完全冇犯法違法啫。然後就會有香港男人自由行街到尖東，聞到啲香水味，行埋去酒店入房搵多年不見嘅朋友，又有冇違法呀。」講到似層層，好似佢去過咁。貿易梁大聲話：「全世界都知啦，係你日日踎響中環，唔過尖東啫。」
講番前輩R俾老婆誤會，貿易梁話老婆一定要冧番嘅，老婆成日面黑黑，自己點會安樂呢？如何冧番呢？要靠把口，貿易梁從一個老友度學到呢一招，嗰位老友係一流推銷員，曾獲公司營銷大獎，把口可以討好樹上雀仔。話說貿易梁某次得罪老婆，老婆嬲到幾乎唔肯上車，要貿易梁半推半扶先至可以推老婆上車坐低響汽車後座。貿易梁做司機，坐低後，猛咁調校倒後鏡，倒後鏡睇到老婆嘅面容，睇咗一陣，老婆發嬌嗔：「衰佬重唔開車！」貿易梁好感慨咁對住倒後鏡講：「睇真塊鏡，我真係衰佬，點似你吖，嬲得咁靚，笑起嚟就更加靚，我點解會配得起你呢？我成世人最夠運就係你當年肯嫁畀我呢個衰鬼窮鬼。」嘩，梁太聽到甜絲絲，成身軟晒，聲音都低幾度：「開車返屋企先至講啦，衰鬼。」貿易梁知道得米，立即開車踏油門衝出停車場。