無綫前晚喺九龍香格里拉酒店舉行「長期服務暨傑出員工榮譽大獎頒獎典禮晚宴」，簡單嚟講即係頒老人金牌，六叔邵逸夫同佢老婆方逸華年年都嚟坐鎮食吓飯，前晚亦一早十指緊扣咁到場。點知之前都曾經同六叔十指緊扣嘅曹眾，原來都已為無綫服務咗十年，所以有份出席領獎。
曹眾前晚差唔多頒獎時先至到，問佢一做十年有乜感想，曹眾竟然九唔搭八咁話：「我同你哋好多記者都識咗十年啦，最緊要第日學多啲嘢，時間過得好快。」
問曹眾乜嘢原因令佢留喺無綫十年，佢竟然話：「唔係無綫我都唔會喺呢行做到𠵱家，每個人嘅十年都好寶貴。」之後曹眾就匆匆入場，不過佢成晚都冇得同六叔拖手，皆因方小姐喺度，呢個神聖任務當然留番六叔老婆方小姐，唔使勞煩佢啦。
前晚單立文、馬浚偉、蔡子健都有到場領取十年金牌，原來宣萱、郭可盈同馬德鐘都做咗十年，馮仁昭唔小心洩露咗佢哋年齡嘅秘密，唔知會唔會俾人尋仇呢？
李蘢怡噚日出席活動，佢話自己啱啱喺杭州千島湖返嚟，呢次去係同何潤東拍電影《黃絲帶》，佢話拍攝其間撞傷咗左腳同臀部，馮仁昭都覺得拍戲成日有意外，所以要小心，唔係啲fans會好心痛㗎！
古天樂前日同李力持到上海為新片《國產凌凌久》舉行記者會，古仔會做呢套戲嘅男主角，佢噚日攞住手槍，一身占士邦造型出現，重有兩個邦女郎拍住㖭，古仔用國語講：「周圍的朋友都說港台還沒有占士邦出來，不如讓我來演。」馮仁昭都覺得古仔咁風流倜儻，呢個角色啱晒佢演啦，只係年紀就輕咗啲。
方力申前晚以「好心大使」嘅身份，同周麗淇出席「分享願望的喜樂」籌款活動。方力申話自己嘅願望係見吓米高佐敦，然後同佢打番場友誼波喎。而今個星期就係方力申大學課程嘅最後一堂，但佢都可能要缺課，方力申就話咁樣反而重好，唔使咁傷感喎，馮仁昭心諗，乜𠵱家啲學生返學都可以咁兒戲嘅？
