現今香港嘅駕駛者，無論是男是女，都喜歡以自動波車作為代步車首選，貪其方便唔使「吊極力子」，就算遇上塞車或響鬧市穿梭都無咁麻煩；但今日《用家報告》主角林小姐卻大唱反調，不但認為手波車易操控外，而且重能夠帶來無窮嘅駕駛樂趣㖭！不如今日就一齊嚟睇吓，佢對以6前速手波作配搭嘅座駕—凌志IS200有何評價啦！
記者、攝影：何永仁
林小姐現時呢部凌志IS200，購入已有年多嘅時間，而且佢重特意選購配用6前速手波嘅Sport版，全因為佢對手波車情有獨鍾：「自從考到車牌之後，我一直都係以手波車代步，就連現有呢部IS200亦唔例外；其實，好多人都認為手波車揸起上嚟會比較麻煩，但嗰種完全掌握響你手中嘅操控感同駕駛樂趣，無論係自動波或半自動波車都唔能夠畀到你，呢個亦係我喜歡以手波車代步嘅主因。」
「IS200令我最欣賞嘅地方，會係佢嗰台6前速手波，耐用度高之餘轉檔又見順滑，拖波嘅反應又唔差，入彎前只需踩一下Brake，再連入兩個低檔，引擎就會好順滑咁將車速減慢，隨後再踏下油門出彎，引擎又能夠提供足夠嘅扭力加速，如此出眾嘅性能表現，實在叫人一試難忘；若改以一套4前速自動波作配搭的話，雖然駕駛者仍感受到嗰份有如賽車式嘅操控感受，但總比不上手波車所帶來嘅嗰種快感。」林小姐說。
佢又覺得IS200嗰台2.0公升直6偈，響VVT-i系統輔助下，不但馬力輸出強勁，就連扭力輸出亦見強橫，令車子起步加速表現變得更強。
曾經以寶馬及日產等不同品牌汽車代步嘅林小姐，認為凌志IS200喺佢眾多曾使用過嘅汽車當中，駕駛舒適感最高嘅一部：「部車畀到我有一種好實在嘅感覺，喺高速公路行車時，穩定性比一般跑車來得好，完全沒有「輕飄飄」嘅感覺，轉彎抹角時嘅操控表現，重好有歐洲車嗰種敏銳感。
另外，部車睇位容易，無論倒後泊車都好方便；不過，最重要都係部車耗油量唔高，真係慳番唔少㗎！」
林小姐除對IS200一套6前速手波，以及出色操控表現給予頗高評價外，其實突出嘅造型及車廂陳設亦係重點之一：「買車前我曾經睇過本田Civic及三菱LancerEvolutionVII（上圖），但後來發現IS200嘅外形及車廂陳設，雖然與前兩者同樣來得極富跑味，但唔會來得太過惡形惡相，車廂設備又極富實用性，衡量過之後就揀咗IS200囉！」
「雖然由睇車到落實購買，都只係一、兩日嘅時間，不過當時三十萬多嘅售價，比不少同級對手來得稍高，或多或少會令人望而卻步，若當時能將售價稍作調低，相信IS200嘅競爭力定會增強不少。」林小姐笑着說。
重記得日本版嘅豐田Altezza（即港版凌志IS200）響推出初時，已有不少獨立車行將之引入，並備受車迷追捧；代理方面有見及此，便引入更高層次嘅凌志IS200抵港，由於有多個不同包裝，以迎合不同車迷口味關係，受歡迎程度遠較水貨Altezza為高，風頭可謂一時無兩。然而，代理方面更引入配用3.0公升偈嘅IS300抵港，並以極吸引嘅價錢推售，難怪因而又再令IS系列，成為一眾車迷嘅追捧目標啦！
引擎：1998cc直6DOHC
馬力：155ps/6200rpm
扭力：19.9kgm/4600rpm
尺碼：4400×1725×1420mm
軸距：2670mm
車重：1395-1455kg
新車售價：$228,900起
查詢：皇冠汽車（25119430）