民主派喺今次區選大發神威，屬於民主派陣營嘅立法會議員梁耀忠，重將票王寶座從左派手上搶過來，攞成四千五百一十二票，認真厲害。八方日前喺立法會遇上呢位街工代表，問佢點解咁叻？佢就猛咁笑，話多謝葵芳街坊支持，啲街坊話梁耀忠多年嚟為葵芳做咗好多嘢，所以拉隊去投票。
同樣做好多「地區工作」嘅民建聯照計都唔會輸蝕吖，唔通真係沙士累事？啲親中團體喺入冬時候最鍾意搞蛇宴，同街坊聯絡感情。
但係沙士過後，大陸唔准活蛇出口；大家諗吓，就算蛇宴照食，都只係食雪蛇，味道肯定打晒折扣，又難怪啲選民不是味兒。而且八方重聽聞，因為蛇肉供應少，來價貴咗，蛇宴想搞都搞唔到咁多。
不過呢，話選輸關蛇宴事，真係有啲睇低香港人嘅智慧，其實今時今日嘅選民，又點會為一餐半餐蛇宴而轉投他人懷抱。不過民建聯一向好迷信呢啲「地區工作」成效，如果中央真心支持民建聯，明年九月立法會選舉前，應該恢復活蛇出口兩個月，香港人可以心安理得進補，至於投票咯喎，又係另一回事。
傳真︰2623-9278
電郵︰