安仔入行以來歷盡浮沉，羅嘉良（撈家）是他的戰友，兩人至今相識二十年，他們入行時，一同簽盧國沾做經理人，一同跟盧國沾打官司解約，一同加入無綫，還先後登上一哥寶座，這一切都是兩人的緣份。
安仔與嘉良未走紅時都是典型窮鬼，這對難兄難弟吃過不少苦頭，安仔笑說：「嗰時我哋一碟叉燒飯兩份食，我重記得係八蚊碟，撈家又好鍾意食魚生，但我哋個袋得百幾蚊使成個禮拜，咁我哋咪碌住卡先，乜都係船到橋頭自然直。
「我哋出道時，乜嘢都講轉數快同醒唔醒目，有啲人夜晚要陪人飲酒，同人風花雪月，我同撈家係比較務實嘅人，乜都唔掂，但我哋經過十幾年嘅訓練，一路都好認真努力工作，唔做任何花巧嘢。」
雖然現在已不像以往般天天聯絡，不過安仔形容他與羅嘉良是心照不宣的好友。他說：「𠵱家我哋各有各忙，就冇乜兩句，見嘅時候都可能係年尾頒獎禮，但一見面會覺得好熟，而我哋亦都會好坦白將自己嘅嘢講畀對方聽。」
事業愛情兩得意，安仔與女友歐倩怡過着愜意的同居生活，是不是非她不娶？安仔有保留地說：「冇絕對，但我哋好開心，好穩定。」
現年三十九歲的安仔，揚言在未來兩年沒有成家立室的打算，一來要為事業拼搏，二來他目前還是喜歡做郭家孻仔多過做人老公。他說：「未來兩年我都冇時間結婚，我喺屋企排第九，冇傳宗接代嘅責任，我係屋企最細嗰個，返親屋企，家人都當我死口靚仔，但結咗婚就會有責任。」