喺金魚缸裏面，未上市就已經氣勢十足嘅股票，例子唔少，就好似今個星期先至開始招股嘅長城汽車（2333）咁，都未開始派招股書，上個星期已經有好幾個行家話有客人要求借定錢，因為佢哋驚銀行到時唔放水。
講番呢隻長汽，有個有份做包銷商嘅朋友同伏勝講，有班國際大戶要求喺今次上市中，回報唔可以少過40個巴仙，如果用最高價13蚊計，即係話隻股要去到18蚊樓上先至掂。聽講本地班大戶亦都講掂數，已經做好晒準備，只係等正式上市就會開車咁話。睇番過去幾隻新股上市時嘅表現都唔錯，隻人保財險（2328）重升足5成，喺咁嘅市況下，炒家們不妨去馬入番隻長汽，估計獲利指數都唔會比人保財險差。
近年祖國唔少地區家庭進入小康階段。喺砵砵車同家電產品需求急升下，對於鋼材嘅需求自然唔少得，有個做分析員嘅朋友話，除咗萬順昌（1001）可以受惠之外，其實隻做緊類似業務嘅創新發展（024）都可以留意吓，佢哋早前搞咗個睇廠團，好多分析員返嚟都話股價偏低，話起碼7毫零子至合理。
創新個價喺呢幾個月嘅低位喺5毫7左右，上個禮拜開始郁番，好似想升返上50日線樓上。據伏勝嘅經驗，公司搵得分析員去睇廠，梗係畀佢哋睇啲新嘢，伏勝估計喺國內經濟急速發展下，公司發展空間相信唔細，創新嘅業務同埋股價應該好快有出頭嘅一日。
伏勝