響較早前，才推出Facelifted新版嘅平治S-Class豪華轎車，最近外國方面又傳來消息，話廠方現正密鑼緊鼓研製新一代型號，新車不但有望響2005年推出之餘，矛頭重直指屬同級對手嘅寶馬7系㖭！
從預想圖中可以睇到，全新平治S-Class嘅外形屬新設計，望落帶點同廠旗艦級豪華轎車Maybach嘅味道，同樣來得豪邁有氣派，而流暢嘅車身線條，更令車子透現出一份活力感；然而，以雙圓燈作組合嘅頭燈，匹配原廠霧燈組合，可提供充裕嘅照明度，晚間行車變得更具安全性。
至於車廂方面，則由於新車仍屬設計階段，故暫時未有關於呢方面太詳細嘅資料，但一般相信空間來得寬敞闊落之餘，設備配搭亦見齊全易用，另據聞廠方更會為新車，裝配一套類似寶馬i-Drive嘅多功能系統㖭！
機械配搭亦有多個選擇，當中包括3.5公升V6（258匹）及5.0公升V8（400匹）等型號，性能表現毋庸置疑；而同屬全新設計嘅氣壓懸掛組合，亦能令車子有不錯循迹表現。有興趣嘅車迷，記住要留意新車確實推出日期喇！