過氣妹妹仔初出道時好省鏡，都叫做紅過一排，之後因為掛住拍拖，事業一直冇乜起色，估唔到佢將全副精神放喺感情度，亦冇乜好結果，早排佢因為老公唔長進，所以離咗婚，佢𠵱家已經三張幾嘢，好難再喺娛樂圈發圍，過氣妹妹仔惟有用佢嘅天賦本錢搵食。
娛樂圈女明星出嚟撈好多時都有，但好少好似過氣妹妹仔咁一call就到，直情好似做咗電召女郎咁，價錢亦收得平，幾千蚊就有交易，所以生意滔滔不絕，不過佢個名𠵱家喺娛樂圈就臭晒，因為全行都知佢出嚟撈。馮仁昭早排喺一間夜店見過呢位過氣妹妹仔，其實佢重keep得好好，不過就化晒濃妝，一臉風塵味，佢搞成咁，馮仁昭都戥佢慘，講真個句，有頭髮邊個想做癩痢呀！
李彩樺（阿Rain）噚日喺將軍澳電視廣播城拍無綫新劇「我師傅係黃飛鴻」，佢話生日收到好多生日禮物，而之前同佢傳過緋聞嘅幾位男友就冇送禮物畀佢，阿Rain話：「不過佢哋都有打電話畀我。」阿Rain話希望明年二十一歲生日，可以喺古堡搞生日派對，最好重放埋煙花，唔知阿Rain到時會唔會帶埋佢個白馬王子出嚟呢？
台灣富商黃任中，𠵱家嘅病情都幾嚴重，每日瘦一磅，得番契女小潘潘陪住佢，黃任中噚日以自己醜嘅原因唔肯見記者，小潘潘就講笑話：「你本來就很醜，怕甚麼。」小潘潘又話驚人哋話佢對契爺咁好，係為咗攞遺產，佢同記者講話黃任中二十年前已經立咗遺囑，我都冇諗過要攞幾多。
徐若瑄日前嚟香港宣傳，雖然行程相當緊湊，但好耐冇行街嘅佢，行經尖沙嘴名店街嘅時候，一時忍唔住同工作人員求情：「拜託，讓我逛一吓好嗎？」結果，徐若瑄喺短短二十分鐘之內就成功搵到心頭好，用咗四萬幾蚊買咗兩套衫、裙、鞋、襪褲同首飾一大堆，所以話女人使錢真係唔到你唔服。
陳慧珊（Flora）噚日接受商台訪問，被問到多位花旦近日是非多多，Flora話：「呢啲嘢係冇得控制嘅，我唔會理又唔會睇，呢個係最好嘅方法。」講到近期收視頻頻報捷嘅《衝上雲霄》，身為女主角嘅Flora話好開心，佢重話因為劇情需要，所以有好多好激嘅親熱鏡頭，Flora自己就覺得好正，話激啲重好喎！大家都咁話啦！
梅艷芳日前去咗京都幫美容公司拍廣告，佢前晚同兩個男助手一齊返香港，十幾個歌迷到場接機，阿梅個樣睇起嚟好攰，唔多想講嘢，即使出聲都氣若游絲，阿梅話佢稍後會返內地拍《十面埋伏》，佢上保母車前突然回頭問記者：「你哋等咗好耐呀？」跟住就面露笑容講句：「拜拜，辛苦晒。」有病在身，阿梅都係休息多啲好。
