聖誕節就快到，最能夠代表呢個節日嘅，當然係聖誕老人同聖誕樹啦，但係個個商場嘅裝飾都會有呢兩個元素，點樣先至可以引起消費者注意呢？太古地產九龍塘又一城商場，就同施華洛世奇合作，將喺商場棵七十呎高嘅聖誕樹，用上超過十萬粒水晶裝飾，太古話有意將棵水晶聖誕樹，申請入健力士世界紀錄㖭。聽講棵水晶聖誕樹，價值逾五百萬。
今個禮拜日會為呢棵聖誕樹搞亮燈儀式，到時聖誕老人會着住件應該係全球唯一用施華洛世奇水晶點綴嘅服飾現身，主持嘉賓重有藝人莫文蔚同名模琦琦，肯定光芒耀目，睇怕要戴太陽眼鏡至掂。
𠵱家經濟氣氛好番好多，市民都會趁節日出外輕鬆一吓，商場大業主要捕捉呢股消費熱潮，就要花多啲心思，諗多啲新招至得嘞。
豪宅備受追捧，所以市場都出現唔少轉手獲利個案，好似尖沙嘴擎天半島咁，聽美聯助理區域經理謝嘉誠講，一名投資者喺十月用三百六十萬，買咗個三座中層H單位，面積九百九十八方呎，揸咗唔夠兩個月，就以三百九十萬賣咗畀位港島區換樓客，賺咗三十萬。
佢話擎天半島因為啱用家同投資者，所以交投一向都唔弱，淨係今個月已經有六宗二手成交。
沙士隨時重臨，日前重引起一場虛驚㖭，市民對住宅衞生關注程度梗係大增啦。香港大學早前做咗一個樓宇健康指數調查，隨機抽出全港五十七幢樓齡由一到四十七年，面積二百到二千方呎嘅私人住宅，根據樓齡、設計同管理嚟評級，分為四個級別。
新地嘅北角豪廷峯（圖四）同元朗采葉庭，就被評為甲級健康大廈，而乙級嘅就有荃灣廣場、牛池灣曉輝花園同沙田春暉花園。睇嚟呢幾個屋苑又多個賣點，令代理更易促銷成功，話唔定價錢可以高啲㖭。
紅磡海逸豪園推出八個連家具單位，不過今次優惠套餐相當特別，發展商長實唔需要特登周圍搵家具布置，而係喺旗下樓盤示範單位，執番啲家具出嚟，利用設計師嘅鬼斧神工，重新布局。
長實何雨盈就話，單位裝修價值由萬零蚊至三十萬，喺海逸出租樓盤示範單位攞嘅家具比較簡單，而出售示範單位執出嚟用嘅家具就貴價啲。
蘭西都覺得示範單位整得咁靚，賣完樓之後就拆晒幾可惜，唔知咁樣叫做「物盡其用」定係「廢物利用」呢？
新盤代理周不時都要四圍走撈客，因為分分鐘會有意外收穫，港置發展商項目部營業經理禤啟豪，就喺東涌推銷新盤期間，促成一宗罕有嘅租務成交。單位係東堤灣畔複式，一千六百幾呎，月租要成三萬蚊，租客重係法籍機場工程行政人員。其實港置喺東涌並無分行，今次嘅成交，真係有賴代理本身夠努力。
蘭西
電郵地址：
