台灣公投冇波及統獨，冇通過不設限版本，解除炸彈，港股期指結算後將淡友打殘，先兩日驚台灣公投有手尾嘅掟Call輪是日大大頓足。恒指大升241點，早知三日事，富貴萬千年。但世上點會有人早知三日事？
威水輪自然係Call唔係Put，有啲升得啱數，跟隨正股移動。有啲升到脫節，炒嘢至緊要睇清楚，計啱數。
中移動Call輪9656升53%，收4.3仙。下月中玩完，溢價3.6%，槓桿率52.3倍。時日無多，風險唔細，不過講晒都係輸清4.3仙咁話。
中石化（386）升10仙，升幅4.3%，Call輪9307收20.5仙，升46%，明年底到期，溢價27.2%，槓桿率11.8倍，升到過火位，溢價唔實際，冇炒家玩，得發行商自買自賣，獨家表演。
聯想（992）升5.5%，末日輪9659收45.5仙，升42%，一日報晒仇，剩番兩個禮拜玩，負溢價0.4%，槓桿率7.4倍。昨日升幅跟貼正股，未來幾日走勢係，正股每變動2%，隻輪升跌就係14%，繼續飛沙走石。
華晨（1114）升1格咁大把，收3.50元，但隻Call輪9300脫晒節，收64仙，升35%，明年6月到期，溢價32.6%，槓桿率5.5倍。溢價唔實際，難明點解有咁多人玩，有16球轉手。除非認為正股幾毫子幾毫子咁升，否則隻輪睇人玩好過自己玩。
章盛