近幾日，多隻工業股公布業績，真係榮辱互見。好彩經紀黃推介嗰幾隻股票，例如震雄集團（057）就不負眾望，中期盈利比去年同期升31%，有成1.08億銀。
至於同日公布中期業績的富士高（927）同嘉利國際（1050），表現就認真麻麻。富士高盈利下跌54.1%，股價一度下跌，但最後升1.4%，1.43元。嘉利中期盈利跌22%，股價昨跌1%，收2.425元，沽壓唔算太大。經紀黃話，皆因兩間公司都能保持派息比率。
經紀黃解釋，因為兩股有唔少芬佬坐咗貨，就算公司業績唔對辦，亦好難話即刻沽清貨，如果公司仍然肯派息，點都叫做執番粒糖，所以股價仍然頂得住。
另外，經紀黃提及一隻高風險股創富生物科技（340），今年8月，中國華源集團認購該公司總值6300萬元新股同可換股債券成為大股東後，隻股曾炒過一輪，但之後就靜咗好耐，但近排又見買賣再度活躍，噚日升7.23%，收0.445元。
經紀黃話，據講華源入主創富之後，將注入一些醫藥生物科技業務，不妨留意吓。
慕容小初