到香格里拉食午餐,聽演講;午餐頭盤係凍沙律,以番茄為主,極為健康,偏偏左丁山唔多鍾意食,𡁻兩塊就算;主菜係一嚿魚(seabass),又硬又韌,食咗半嚿就冇心機。結果就喺下晝四點就腹如雷鳴,請秘書叫外賣,佢叫嚟一個下午茶餐,牛油多士、腸仔、煎雙蛋、午餐肉出前一丁(加兩蚊)、熱檸茶,找數要三十大元,食到飽得滯㖭。晚上去小南國(銅鑼灣)食蟹粉石頭飯、灌湯生煎包、葱燒刺參、香辣牛腩(以上由公關大姐大推薦),恐怕裝唔落肚。
香格里拉宴會廳內,撞到張敏儀大姐。張大姐上個禮拜去東京小遊,星期六晚趕返嚟,第二朝就去投票選區議員,果然熱心,佢話:「多我一個唔多,最開心就係見到過百萬人去投票站!」星期日晚上,張大姐到文化中心劇院觀看中文大學校友演《中大人家》,自願上台做臨記,與鄭海泉、鍾景輝、古天農及其他一班校友在台上行行企企,聽主要演員講對白。張大姐話:「套劇好好睇,在台上企得好高興。李國章以前校長身份,中場休息之時突然在後台出現,畀大家一個大驚喜;謝幕之時,大家請佢上台,李局長好投入噃。」點止投入呀,左丁山喺另外一位在場人士聽到,李局長在台上有啲眼濕濕㖭,唔知係唔係諗番做校長容易過做局長呢?中大校友做完戲之後,跟着喺十二月六日在會展中心搞大宴會,宴會主席係郭炳聯,負責節目嘅就係張敏儀,張大姐話賣咗二百五十張枱,編排大傷腦筋,每張枱加多一個位都唔得(會展中心唔同意),更加有校友不斷向佢撲飛撲枱,佢話至愛親朋都冇法子容納喎。