港台最惹火嘅節目《頭條新聞》高級監製施永遠被調升，接替戴健文做港台機構傳訊總監，即係大公關兼發言人，於是有政治過敏嘅人如八方就問，係唔係涉及政治問題，或者廣播處處長朱培慶怕咗徐四民日日喺度炮轟，所以出此「上策」？
施永遠梗係話絕無其事，況且超人林超榮嘅環節都仍然有，大家唔信冇變，可以監察住佢哋喎。當然Forever施撫心自問，個人嘅興趣係做記者，拍嘢就最開心。但佢亦好公關咁話，由九七年起已經做多咗好多行政工作，條路係咁行，冇法啦。
公務員自願退休計劃第二期落實，港台好多老臣子好似黃法之同蘇狄嘉等都退下火線。至於升級嘅亦唔少，新任教育電視台長嘅戴建民話佢諗緊點將啲節目重新包裝進入家庭；而二台新節目總監陳耀華就認為SMS同internet嘅潛力好大，將來啲聽眾分分鐘可以用短訊點唱，真in。
傳真︰2623-9278
電郵︰