SONY一年一度嘅影音Show「SONYFair2003」，昨日剛剛喺時代廣場正式開幕，各位有機會親身試玩SONY最新數碼產品，今年更特別嘅係由日本請得首次來港嘅夢幻機械人QRIO（音Q佬），到現場參觀除咗可以睇到QRIO表演舞蹈外，只要拎$20出嚟做善事，更有機會同佢合照留念。
記者：許福合
攝影：伍慶泉
ImageGirl：Winnie
SONY發展機械人早已有迹可尋，早年嘅電子狗AIBO其實只係小試牛刀，今次呢部機械人先係主菜。論高檔，今次QRIO當然比AIBO複雜得多，全身感應器數目多不勝數，由距離、壓力、加速、負重、視覺及聽覺都有感應器，兼且內置WiFi卡，可以無線接收操作訊息，最緊要係全身共裝有3個處理器，先可以有咁靈活嘅反應。
包括小記在內，見到呢位QRIO機械人，當然第一時間擁上前睇睇佢究竟有乜特別，見到QRIO身邊總圍住一大班人，可見佢相當受歡迎！580mm高的QRIO（約到成年人膝頭）集合頂尖人工智能技術製成，會對周圍變化有反應，用兩腳行路亦似模似樣，加上身形細小，就好似小朋友一樣，相當趣怪！細心觀察，發覺QRIO之所以行得咁好，全因使用感測器，可以幫助辨別地形，不斷調整步姿，平衡功夫一流。
頭部兩隻眼唔係裝飾，裏面裝咗兩個CCD鏡頭，可以立體觀察環境，正係一眼關七，加埋一身嘅監測器，識得避開碰撞同障礙物，即使「失手」跌低，都可以靠自己爬番起身，一啲都唔失禮。QRIO表現過活動能力之後，更走上舞台，跳番隻熱舞，估唔到佢嘅節奏感都唔錯，可以隨歌起舞，展示獨創嘅舞蹈，跳得好唔好唔緊要，勝在娛樂性十足。
試玩新產品之餘，走過SCEH重可以優先試玩原定12月推出《GT4》序章《Prologue》版，當中收錄咗最熱門跑車，像真度亦更高，而且會有中文版推出，唔少玩家已經好心急，要親身感受《GT4》嘅威力，不過現場人太多，想揸番轉就要俾啲耐性，唔該排隊！
黑色PS2見唔少，白色嘅PS2你又見過未？SCEH就首次喺香港展出一部陶瓷白嘅限量版PS2，會喺嚟緊聖誕嘅亞洲遊戲展2003先有得賣，現場吸引力絕對唔會比《Prologue》弱。
日期：11月28日~12月1日
地點：銅鑼灣時代廣場露天廣場
網址：
SONYHK
查詢電話：23452966
現場花絮
呢次SONYFair2003睇到產品數量之多，簡直數都數唔晒，惟有精選幾件至Hit產品供各位過目！
DSC-T1最大芒
DSC-T1嘅型仔外形都唔使多講，拍到500萬像素相片，又有2.5吋大芒，梗係成為場中焦點，試玩過嘅拍友評語唔係「好薄！」就係「個芒好大！」，場中必玩！
DSC-F828高解像
另一部DSC-F828係800萬像專業級數碼相機，採用4色CCD，而且可以使CF同MS記憶卡，重未正式開賣，只是放在玻璃箱內畀大家望機止渴。
DSC-U50手繪版
U50雖然都出咗一段時間，但現場就發現一部手繪版U50，配合獨特花紋，感覺煥然一新。
50吋超大Plasma可插MS
走埋去呢個KE-50MR150吋Plasma，人都好似變得縮細咗，50吋嘅Plasma現時巿面都唔多見到，賣到$71,990，唔少人襯住呢次展覽睇過夠本。旁邊原來重設有MS插槽，方便用家直接欣賞相片或MPEG1影片。
