大市唔落得，果然又再升過。恒指一衝，大升241點，成交亦大增到131億元，期指高水18點。今次調整，恒指在50日線獲支持而反彈，並重上10日線及20日線，短期可向月初的12537高位挑戰。
國企呢幾日轉強勢後，噚日升勢轉急，基金揸重貨，又贏得漂亮一仗。國企指數全日勁升118點，升幅3.1%，成交急升到22億元，比前日大增78%。在熱門的石化同鋼鐵股升勢催谷下，幾隻較冷門的大價國企股，升得更勁，首都機場（694）就大升13.4%，兗州煤業（1171）同成都普天（1202）分別有9.5%同7.8%進帳。
鋼鐵股同石化股都有火車頭，前者係鞍鋼（347），升8.1%，後者係上海石化（338），升5.2%，且創出5年新高；燕化（325）同吉化（368）則升約4%。上石化已突破，吉化噚日成交亦倍增，下周圖表將出現入貨訊號，上月中吉化高位見1.56元，跟住的個多月，形成大型三角形，阻力為1.5元，下周破位而上機會甚大，以量度升幅計，短期目標指向1.98元。
中國航空科技工業（2357）走勢亦處於突破邊緣，係另一隻短線有機會賺10%至20%的股份。中航科工除上市頭3日（上月底本月初）波動較大外，其餘交易日股價表現好牛皮，在1.65元至1.54元內窄幅上落，近日由低位回升，若衝破1.64元的上阻力，照度上去，可見1.95元。
新股長城汽車（2333）下月上市，行內普遍已預計會掀起認購熱潮，上市後PE會企於15至17倍水平。中航科工現價預測PE約13倍（以加權平均每股盈利計），因此，後市有20%至30%的上升空間。
中航科工主要產銷小型汽車，係中國四大之一，同時亦係內地唯一的直升機廠，現時中國民用直升機少於100架，政府已計劃開放低空領域使用，因此未來市場發展潛力極大。
中航科工上市後，基金一直在密密收集，除歐洲航空國防工業公司（EADS）作為策略股東，持有13.8%H股外，已宣布的有澳洲聯邦銀行持有6.1%，由於基金已收集了個多月，貨源已歸邊，隨時會發力。
郭兆誠