美股前晚雖然休市，歐洲及亞太區股市亦只係個別發展，不過期指結算後，港股卻可一枝獨秀，市場傳出本港第三季經濟增長會相當理想，刺激恒指全日勁升241點，收報12317，成交亦增至131.78億元。收市後，第三季經濟增長率竟然高達4%，比一般預期的3%為高。
黑客話，早前資金因怕恐怖襲擊在歐美出現，因而保留手上銀彈，但美國經濟數據表現強勁，銀彈肯定會在假後射出，所以有資金預先流入港股，憧憬美股假後勁升，支持港股進一步上揚。
近期金價高企，港股就快有隻金礦股上市。紫金礦業下個月會來港上市，招股價介乎2.60－3.20元，發行3.483億股H股，集資9-11億元，PE約為11-15倍左右。現時香港股市上市的礦業股，PE相對高昂，如江西銅（358）PE高達49倍，而中國鋁業（2600）亦高達33倍，除非市場突然看淡金價，否則隨時會出現換馬情況，對江西銅與中鋁一定要保持戒心。
富士高（927）中期營業額增長6.2%，但純利卻大跌54.1%，反映整體邊際利潤大為收窄。最弊係公司竟然再撥4680萬元投資證券及基金，以增加回報。
傳統智慧告訴阿虎，公司如果有多餘錢，一係就擴展業務，一係就派畀股東，如果將資金用來炒股，不務正業，通常會被機構性投資者唾棄，日後亦好難再吸引芬佬捧場。不過，此股噚日未受業績差勁所影響，收報1.43元，升1.4%。
阿虎