鄭希怡（Yumiko）早排拍攝最新歌曲《痛由自取》MV，重請嚟《當四葉草碰上劍尖時》嘅男主角黎諾懿擔任主角。
內容講述飾演Yumiko男友嘅黎諾懿一腳踏兩船，搞到Yumiko好傷心，佢哋拍一場攤牌戲時，黎諾懿重要摑Yumiko。
Yumiko為咗緩和氣氛，拍攝前四圍跳跳紮，重玩埋一字馬㖭。到正式埋位時，Yumiko就叫黎諾懿唔好留力，點知佢俾黎諾懿打完後，竟然靜雞雞坐埋一邊喊，嚇到全場嘅人鴉雀無聲，黎諾懿尷尬到唔知點做好，惟有向Yumiko道歉。
Yumiko話：「我同佢講唔緊要，係我叫佢大力啲㗎嘛，但咁大個女第一次咁樣俾人兜巴星，而且又真係好痛，所以先忍唔住喊囉。」如果Yumiko喺現實生活中俾男友打，唔知會唔會啞忍呢？
李珊珊、黃日華同有線電視揸弗人徐小明等噚日喺粉嶺舊裁判法院為《靈異偵緝檔案II》舉行開鏡拜神，有傳話拍呢齣劇時發生咗唔少怪異事，所以噚日就搵嚟一位師傅喺裁判法院內所有角落拜神。我馮仁昭都覺得，求個心安都好呀！
陳慧琳（Kelly）早前接受新城DJ顏聯武嘅訪問，佢話因為工作太忙，唔能夠成日見到男友，所以好掛住對方。Kelly重自爆感動事，佢話男友原來一直將佢送嘅禮物珍藏，不過自己就喺上次分手時，將對方送嘅禮物全部丟晒。Kelly嘅男友聽到呢番話，唔知會唔會好傷心呢？
鄧兆尊噚日喺無綫祝捷會上又好妙咁回應有周刊話佢敗家仔呢件事，佢話如果佢真係使咗咁多錢，咁自己都可以算係一個好成功嘅敗家仔。
兆尊重話自己只係一個孭債董事，而且一直以嚟都係靠自己，咁大個仔使得最多錢嘅一次都係亡父祥哥入院時，佢話一日要花成二十幾萬喎。
日前有周刊話陳鍵鋒同古天樂嘅男助手經常出雙入對，噚日陳鍵鋒喺尖沙嘴出席活動時，話唔會為咗呢件事而嬲，因為佢嘅EQ好高，佢重話等下次本周刊寫得好啲先至回應喎。
有人提議陳鍵鋒拖番個女朋友出嚟澄清，不過佢就話就算拍拖都唔會特登講出嚟。陳鍵鋒EQ咁高，睇怕張栢芝要向佢學習啦！
香港電台即將有高層大變動，下月四號就正式退休嘅中文台台長黃法之，佢嘅職位將交由一台台長周偉材補上。而現為二台台長嘅李再唐，就會調去做港台機構發展組總監，李再唐原來嘅職位會由做開公共事務節目嘅陳耀華接替。至於另一高層蘇狄嘉，下月尾亦都因為約滿而同港台講拜拜。
