亞Mark身邊有口痕友報料，話根據最新資料顯示，豐田Alphard豪華MPV一直係偷車大盜嘅頭號目標；有人歸咎於呢部Alphard，賣相出眾又可靠之餘，重有出色嘅性能及操控表現，加上本地無行貨引入關係，搞到部Alphard奇貨可居咁話。
不過，後者嘅藉口同理由或許會好快消失，事關亞Mark最近收到風，香港代理正有計劃引進行貨版Alphard，消息是否真確，大家不妨拭目以待；惟記憶所及，第一代「子彈頭」嘅豐田Previa，都係水貨商賣到開晒巷之後，代理方面才施施然引入嘛！至於屆時代理會考慮邊款Alphard版本，相信會係頂級版莫屬，事關家陣小至Corolla、Picnic，大至Previa車系，全屬頂級裝備㗎！
另方面，日前皇冠車行內部有人事變動，原任GeneralSalesManager一職嘅ErnestWong，會調任至Hino貨車部，而佢嘅位置就會由負責開的士及小巴部嘅SamsonTsui負責，由於兩者行事有好大分別，若然Alphard正式打入香港，相信勢必掀起另一次Alphard熱潮都唔定㗎！