賭王何鴻燊及女兒何超瓊昨日往中環太子大廈，賀由潘廸生代理的名店開幕。有報道指四姨太梁安琪與二姨太藍瓊纓的子女爭身家，又指賭王曾中風，何超瓊昨日呼大吉利是，而賭王則說：「咒都冇用，愈咒愈健康。」
由潘廸生代理的名牌PavillonChristofle昨日於中環太子大廈的新店開幕，到賀名人眾多，包括賭王何鴻燊及女兒何超瓊、東亞銀行主席李國寶的太太潘金翠及兒媳等。
早前有報道指賭王何鴻燊身體大不如前，曾經中風，二姨太藍瓊纓一房及四姨太梁安琪密謀分身家，二姨太更就此事開腔說：「發神經，咁咪好似咒我老公。」
超瓊昨日提起此事亦表示不悅，問到其父的健康狀況，她說：「你哋（指記者）個個都冇佢咁健康。」提到賭王慶祝八十二歲大壽當天，分別與三位姨太慶祝，超瓊說：「你哋睇佢嗰日幾頻撲，去咗幾個地方，一個體質差嘅人都做唔到啦。」
報道指賭王曾中風，超瓊說：「啲料係假嘅，佢係扭親腳嘅筋骨，做咗手術先要揸枴杖。醫生話即使四十歲嘅人做過呢個手術，都有可能要坐輪椅，啲人冇嘢寫就搵我哋嚟作古仔。」問超瓊近期家中喜事連連，是否很掃興？她說：「梗係啦，如果思想傳統嘅，一定覺得大吉利是，好在爹哋睇得開。」
而賭王何鴻燊對於分身家及關於其健康的報道亦輕鬆說：「咒都冇用，愈咒愈健康。」至於女兒超儀表示會再接拍三級片，賭王說：「食飯時有勸過佢，我叫佢免得過，就唔好再拍，佢就同我講『我拍嘅係藝術片，唔係拍三級片』。」賭王並說：「個女都過咗二十一歲，冇得控制。」
採訪：RitaLeung攝影：HoKwokHo
