食物環境衞生署為求改善餐廳衞生情況（目的當然係防止沙士重臨），向業界發出諮詢文件，餐廳羅一睇見就勞氣，因為諮詢文件講明發給臨時餐廳牌照之前，開辦嘅餐廳一定要完成詳細嘅餐廳衞生工程計劃，例如油煙、抽氣等等，餐廳羅認為三幾年前，攞個臨時牌照嚟開門營業，非常艱難，後來因為經濟不景，政府讓步，開辦新餐廳，經有關當局檢查後，就發出臨時牌照，詳細改善計劃可以邊做生意，邊做工程。現在食環署嘅建議，就係還原基本步，業者開餐廳，被逼非法經營。
餐廳羅最唔順嘅就係，食環署加緊壓逼有牌餐廳改善衞生條件，但另一方面就對啲私房菜視若無睹，餐廳羅曾經去過一啲「樓上餐廳」（即私房菜），佢一睇就知道唔合消防條例及食環署條例。餐廳羅大發牢騷：「我哋攞正牌做生意，開張前成日俾消防處阿支阿左，又會俾衞生幫辦說三道四，攞個牌好唔容易，攞酒牌又要向警方申請。咁啲私房菜攞乜嘢牌呀，飲酒都得㖭，酒牌呢？食環署點解唔去冚私房菜，偏偏淨係要我哋遵從咁嚴厲嘅衞生守則？搞唔掂，我都執咗佢，走上三樓搞私房菜。」
有啲私房菜產品，確係好掂，鏞記附近有一間私房菜極受歡迎，女賓架D要訂位，日期去到明年七月，嚇咗佢一跳。但私房菜有冇攞正牌，完全遵守消防條例呢？木宰羊，此亦香港怪現象也，正是守法者守法維艱，不守法者，搵食匪艱。