陳慧琳（Kelly）和劉德華日前接受雜誌訪問，大談好人和壞人的定義，Kelly深信性本善，堅持自己要做個好人。但華仔竟謂已放棄做好人，因他認為每個人都有自我中心，無論怎樣做都不可能滿足所有人的要求。
劉德華在電影《無間道》中飾演卧底警察，後來他改邪歸正，在片中不斷說「我想做好人」，華仔最近和陳慧琳為時尚雜誌《Harper'sBazaar》做訪問，便談到好人和壞人定義。
問Kelly和華仔對好人的看法，Kelly說：「心地善良，唔做傷天害理嘅事，就係一個好人。」
華仔則滔滔不絕地說：「我認為每件事背後都有佢嘅意義，有個人嘅選擇同原因，所以唔可能有好壞同錯對。壞人都可能喺度做緊好事，好人或者不過係好心做壞事，所以，好人係冇一定嘅定義。如果一定要講，一個人凡事都用愛去出發，只要能用愛心去面對呢個世界嘅話，已經係好美好。」
Kelly認為要做一個壞人是相當困難，她說：「對我嚟講，要做出違背良心嘅事，真係好難。我相信人一出世就係好人，我相信人性本善，只係人容易學壞啫。」
可是華仔竟謂已放棄做好人很久，他說：「你教我點做好人？每個人都有佢嘅選擇同希望嘅事情，人心習慣以自己為主，但因為每個人嘅標準都唔同，無論你做乜嘢，始終都唔可以令世界上每一個人都認同你，認為你係最好。我哋從細就開始被教育，要力爭上游同將人去分唔同等級，呢幾年我都冇再去想做好人，我只係盡量做一個唔傷害人嘅人，同埋可以令大家開心而自己又開心嘅人。」
對於男女是否平等的問題，Kelly說：「我都希望有一日男女真係可以做到好平等。」但華仔則持不同見解，他說：「男女擁有唔同嘅特質，世界上唔可以缺少男人，亦唔可以缺少女人。我覺得唔係平等，係應該用公平方法去處理，男女可以分工合作，各取所需，公平相待，咁咪重好。」
撰文：比華利