當年打正金城武牌頭嘅《鬼武者》，一出就大受歡迎，一、二集都有唔錯嘅銷量，而CAPCOM就好聰明咁係明年三月《鬼武者3》推出前，以《鬼武者：無賴傳》延續人氣，玩法重嚟過大兜亂，以動作格鬥形式登場，對於唔想太花時間喺解謎、搵出路嘅機迷，《鬼武者：無賴傳》爽快式打法會幾啱Feel。
記者：徐影龍
開發商聲稱《鬼武者：無賴傳》乃補足《鬼武者1、2》故事內容，所以遊戲內有齊兩集嘅正邪角色登場，除明智左馬介（金城武）同柳生十兵衛（松田優作）兩大主角外，重包括風魔小太郎、女忍者楠、嗜酒肥佬安國寺等十多名角色，每人都有唔同背景同故事，加上升LV育成元素，可謂相當之襟玩。
隱藏元素已成必需之物，除多款武器及道具外，重已預定大量未開啟角色框框等你發掘，如織田信長、魔界劍士等強勁人物，最驚喜係「洛克人」CrossOver客串登場，用佢嚟同金城武對打的確幾搞笑。
不論使用哪一角色，最終首領都係幻魔王．織田信長，此君攻擊力及速度均超晒班，游鬥尚有一線生機，硬撼則必死無疑。筆者卻發現大可利用敵人狂追猛打特點，跳到圖中所示地方，當信長一追埋嚟就劈番佢落去，便可慢慢地「陰乾」佢HP。要注意係小心身後火柱，企到啱啱火燒唔到，就係最佳屈機位置。
由於《鬼武者：無賴傳》改為對戰格鬥式玩法，有別過往解謎、殺敵、發展劇情，落喺格鬥祖宗CAPCOM手上應有一番作為，令筆者抱着頗大期望。玩落發覺原來另一回事，大部份玩法都係見一個斬一個，經常以一敵十，連招又單調，最重要嘅一閃系統跟舊作一樣極難運用，嚴格嚟講算係動作Game多過格鬥Game。
較可取係四打系統，接駁四打分線器後，便可進行2對2式大亂鬥，全場你追我逐、恃強凌弱、鬥搶寶物等，開Party玩氣氛即時高漲，就算單打都可揀番個電腦拍檔幫拖，算係兼顧到單人至多人嘅玩法。
今次《爆機狂迷》專誠搵嚟香港CAPCOM，送出50張《鬼武者：無賴傳》大海報畀讀者，有齊金城武、松田優作等角色，兼且印刷精美。讀者只需今日手持本版，到DreamStore便可免費換領，每人限換一張，先到先得，送完即止。
地址：灣仔東方188商場256號舖
電話：25753285
