成功進軍荷李活的名導演吳宇森曾與多位巨星合作，包括湯告魯斯和尼古拉斯基治等，原來他有自己一套與外國人相處的秘技，就是帶他們品嘗中菜，從而展開友誼。
由香港電台電視部製作的全新一輯《傑出華人系列》將於後晚七時於無綫推出，打頭陣是成功進軍荷李活的名導演吳宇森。據港台監製施潔玲表示，她與港台攝製隊先後到澳洲和美國多次採訪吳宇森，籌備和製作時間長達六年。
訪問中吳宇森除講述自己的電影工作、所遇挫折和跟外國明星相處之道外，更有吳宇森與太太在美的生活點滴。節目中，吳宇森自爆用「食」來跟湯告魯斯和尼古拉斯基治展開友誼。
吳宇森說：「我認為宣揚文化要由飲食開始，記得拍《職業特工隊2》嘅時候撞啱TomCruise（湯告魯斯）生日，我幫佢搞咗個神秘party，喺一間中國餐廳食海鮮。TomCruise食得好開心，佢同我講，話從來都唔知道中國菜原來係咁好味。」
吳宇森續說：「有一次我同NicholasCage（尼古拉斯基治）合作，帶佢出街食中國菜，佢又係食得好開心，第一次接觸到中國文化，自此之後佢對中國好有興趣，連屋企布置都好中國化，用食呢招嚟展開友情，係最好不過。」
吳宇森又談到初到美國荷李活發展時，對荷李活的運作完全不能適應，例如他拍攝第一部電影《終極標靶》後，於剪片房剪片時，無意中發現該片男主角尚格雲頓與另一剪片師，也正在為該電影剪片，登時氣得吳宇森七孔生煙。
吳宇森說：「我知道咗之後好嬲，覺得好唔尊重製作自由。我喺香港拍戲好緊張剪片呢樣嘢，記得拍《帝女花》嗰陣時，我攞住支壘球棍企喺剪片房門口，邊個走入去掂我啲嘢，就打邊個……點知去到荷李活，啲演員原來係有權咁做。」
除了不適應荷李活的制度外，開會時間冗長亦令吳宇森受不了，他說：「唔習慣拍一部戲開會可以開足六個月，六個月喺香港已經拍完一部戲啦。開會又唔係講建設性嘅嘢，淨係討論件衫白色好定綠色好啲，傾唔掂第日再開會傾過，真係好無聊。」雖然無聊，但吳宇森最終仍是妥協，否則亦不會有今天的吳宇森了。
撰文：戴彩煥