荷李活男星班亞弗力（BenAffleck）自從同女友珍妮花洛庇絲（JenniferLopez）合演《Gigli》仆直之後，佢嘅星運直線下滑，比起舊年佢當選《People》雜誌最性感男士、同埋主演賣座電影《驚天核網》及《夜魔俠》嗰陣真係差得遠！所以班仔好希望趁同籮霸合作嘅《JerseyGirl》下年上映之前，搵套動作電影《Paycheck》挽回頹勢。
其實早排已經有傳聞話，原本諗住用班仔嘅電影公司想飛起佢，驚佢拖冧部戲，所以如果今次《Paycheck》都唔掂，班仔相信都幾麻煩！不過講真執導呢部戲嘅吳宇森都一樣，佢上次部《烈血追風》係舊年蝕得最勁嘅荷李活電影之一，相信佢都好想翻身。
今次《Paycheck》有呢排勁hit嘅奧瑪花曼（UmaThurman）助陣，故事改編自《2020》同《未來報告》原著作家嘅作品，以人類記憶為題材，話說班仔係一個電子工程師，佢完成咗一個秘密計劃後，突然唔記得晒過去兩年做過啲乜，原來佢當初選擇接受一筆巨款而放棄記憶，但係當佢想兌現張支票嗰陣，又發現之前已經同意用一包唔值錢嘅嘢代替！唔知班仔最終攞唔攞得番應得嘅嘢呢？